ಶನಿವಾರ, ನವೆಂಬರ್ 14, 2026

ಕಸ್ತೂರಿ ಸಿಂಚನ - ಒಮಾನ್ ಕನ್ನಡಿಗರು ಕರ್ನಾಟಕ ರಾಜ್ಯೋತ್ಸವ ವಿಶೇಷಾಂಕ – 2026 ಲೋಕಾರ್ಪಣೆ




ಒಮಾನ್ ಕನ್ನಡಿಗರ ‘ಕಸ್ತೂರಿ ಸಿಂಚನ’ ರಾಜ್ಯೋತ್ಸವ ವಿಶೇಷಾಂಕ ಲೋಕಾರ್ಪಣೆ

 ವಿದೇಶಿ ನೆಲದಲ್ಲಿದ್ದರೂ ಕನ್ನಡ ಭಾಷೆ, ಸಾಹಿತ್ಯ ಮತ್ತು ಸಂಸ್ಕೃತಿಯ ಮೇಲಿನ ಅಭಿಮಾನವನ್ನು ಜೀವಂತವಾಗಿರಿಸಿಕೊಂಡಿರುವ ಒಮಾನ್ ಕನ್ನಡಿಗರ ಸಾಹಿತ್ಯಾಸಕ್ತಿಗೆ ಮತ್ತೊಂದು ಸಾಕ್ಷಿಯಾಗಿ, ಒಮಾನ್ ಕನ್ನಡಿಗರು ಸಾಹಿತ್ಯ ಬಳಗದ ವತಿಯಿಂದ ಪ್ರಕಟಗೊಂಡಿರುವ ‘ಕಸ್ತೂರಿ ಸಿಂಚನ – ಒಮಾನ್ ಕನ್ನಡಿಗರು ರಾಜ್ಯೋತ್ಸವ ವಿಶೇಷಾಂಕ 2026’ ಕೃತಿ ನವೆಂಬರ್ 13, 2026ರಂದು ಮಸ್ಕತ್ ಕನ್ನಡ ಸಂಘ ಆಯೋಜಿಸಿದ್ದ ಕರ್ನಾಟಕ ರಾಜ್ಯೋತ್ಸವ ಸಮಾರಂಭದಲ್ಲಿ ಲೋಕಾರ್ಪಣೆಗೊಂಡಿತು. ಮಸ್ಕತ್ ಕನ್ನಡ ಸಂಘದ ಕಾರ್ಯಕಾರಿ ಸಮಿತಿಯ ಸದಸ್ಯರು ಕೃತಿಯನ್ನು ಅಧಿಕೃತವಾಗಿ ಬಿಡುಗಡೆಗೊಳಿಸಿದರು.

        ಈ ವಿಶೇಷಾಂಕದಲ್ಲಿ ಒಮಾನ್‌ನಲ್ಲಿ ನೆಲೆಸಿರುವ 30ಕ್ಕೂ ಹೆಚ್ಚು ಕನ್ನಡ ಬರಹಗಾರರ ಲೇಖನಗಳು, ಕಥೆಗಳು, ಕವನಗಳು, ಪ್ರವಾಸ ಕಥನಗಳು ಹಾಗೂ ಸಂದರ್ಶನಗಳು ಸೇರಿದಂತೆ ವೈವಿಧ್ಯಮಯ ಸಾಹಿತ್ಯ ಪ್ರಕಾರಗಳಿಗೆ ಅವಕಾಶ ಕಲ್ಪಿಸಲಾಗಿದೆ. ಒಮಾನ್ ಕನ್ನಡಿಗರು ಸಾಹಿತ್ಯ ಬಳಗದ ವತಿಯಿಂದ ಪ್ರಕಟವಾಗುತ್ತಿರುವ ನಾಲ್ಕನೇ ಕೃತಿ ಇದಾಗಿದ್ದು, ಈ ಹಿಂದಿನ ಪ್ರಕಟಣೆಗಳಾದ 1)‘ಅರಬ್ಬರ ನಾಡಿನಲ್ಲಿ ಕನ್ನಡಿಗರು’, 2)‘Beyond the Horizon – Indian Voices from Oman’ ಹಾಗೂ 3) ‘ಕರ್ನಾಟಕ ರಾಜ್ಯೋತ್ಸವ ವಿಶೇಷಾಂಕ – 2025’ ಕೃತಿಗಳು ಓದುಗರ ಗಮನ ಸೆಳೆದಿದ್ದವು. ಈ ಎಲ್ಲ ಕೃತಿಗಳ ವಿಶೇಷತೆಯೆಂದರೆ, ಒಮಾನ್‌ನಲ್ಲಿ ವಾಸವಾಗಿರುವ ಕನ್ನಡಿಗರೇ ತಮ್ಮ ಅನುಭವ, ಆಲೋಚನೆ, ಸೃಜನಶೀಲತೆ ಮತ್ತು ಸಾಹಿತ್ಯ ಪ್ರತಿಭೆಯನ್ನು ಅಕ್ಷರರೂಪದಲ್ಲಿ ಅಭಿವ್ಯಕ್ತಿ ಪಡಿಸಿರುವುದು.

ಈ ಸಾಹಿತ್ಯಿಕ ಚಟುವಟಿಕೆಗಳ ಹಿಂದೆ ನಿರಂತರವಾಗಿ ಶ್ರಮಿಸುತ್ತಿರುವವರು ಕರ್ನಾಟಕ ಮೂಲದ ಶ್ರೀ ಪಿ.ಎಸ್. ರಂಗನಾಥ ಅವರು. ಕಳೆದ 20 ವರ್ಷಗಳಿಂದ ಮಧ್ಯಪ್ರಾಚ್ಯ ರಾಷ್ಟ್ರಗಳಲ್ಲಿ ನೆಲೆಸಿರುವ ಅವರು, ಕುವೈತ್ ಮತ್ತು ದುಬೈಗಳಲ್ಲಿ ತಮ್ಮ ವೃತ್ತಿಜೀವನವನ್ನು ರೂಪಿಸಿಕೊಂಡು, ಪ್ರಸ್ತುತ ಒಮಾನ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. ತಾಯ್ನಾಡಿನಿಂದ ಸಾವಿರಾರು ಮೈಲಿ ದೂರದಲ್ಲಿದ್ದರೂ ಕನ್ನಡ ಭಾಷೆ, ಸಾಹಿತ್ಯ ಮತ್ತು ಸಂಸ್ಕೃತಿಯ ಮೇಲಿನ ಅವರ ಪ್ರೀತಿ ಹಾಗೂ ಅಭಿಮಾನ ಕಿಂಚಿತ್ತೂ ಕಡಿಮೆಯಾಗಿಲ್ಲ. ಹವ್ಯಾಸವಾಗಿ ಆರಂಭವಾದ ಅವರ ಸಾಹಿತ್ಯ ಕೃಷಿ ಇಂದು ಗಮನಾರ್ಹ ಬೆಳವಣಿಗೆ ಕಂಡಿದೆ. ಅವರು ರಚಿಸಿರುವ ಲೇಖನಗಳು, ಕಥೆಗಳು ಹಾಗೂ ಕವನಗಳು ವಿವಿಧ ಕನ್ನಡ ದಿನಪತ್ರಿಕೆಗಳು ಮತ್ತು ನಿಯತಕಾಲಿಕೆಗಳಲ್ಲಿ ಪ್ರಕಟಗೊಂಡು ಓದುಗರ ಮೆಚ್ಚುಗೆಗೆ ಪಾತ್ರವಾಗಿವೆ.


ತಮ್ಮ ವೈಯಕ್ತಿಕ ಸಾಹಿತ್ಯಾಸಕ್ತಿಯನ್ನು ಸಮುದಾಯದ ಸಾಹಿತ್ಯಿಕ ಬೆಳವಣಿಗೆಯೊಂದಿಗೂ ಬೆಸೆದುಕೊಂಡಿರುವ  ಶ್ರೀ ರಂಗನಾಥ ಅವರು, ಒಮಾನ್‌ನಲ್ಲಿ ನೆಲೆಸಿರುವ ಕನ್ನಡ ಬರಹಗಾರರನ್ನು ಗುರುತಿಸಿ, ಅವರ ಪ್ರತಿಭೆಗೆ ಸೂಕ್ತ ವೇದಿಕೆ ಕಲ್ಪಿಸುವ ಉದ್ದೇಶದಿಂದ ಒಮಾನ್ ಕನ್ನಡಿಗರು ಸಾಹಿತ್ಯ ಬಳಗವನ್ನು ಮುನ್ನಡೆಸುತ್ತಿದ್ದಾರೆ. ಹೊಸಬರು ಮತ್ತು ಅನುಭವಿಗಳೆಂಬ ಭೇದವಿಲ್ಲದೆ ಎಲ್ಲರಿಗೂ ಮುಕ್ತ ಅವಕಾಶ ನೀಡುವ ಮೂಲಕ ಕನ್ನಡ ಸಾಹಿತ್ಯ ಕ್ಷೇತ್ರದಲ್ಲಿ ಹೊಸ ಪ್ರತಿಭೆಗಳು ಬೆಳೆಯಲು ಪ್ರೋತ್ಸಾಹಿಸುತ್ತಿದ್ದಾರೆ.


ವಿದೇಶಿ ನೆಲದಲ್ಲಿ ಬದುಕು ಕಟ್ಟಿಕೊಂಡಿದ್ದರೂ ಮಾತೃಭಾಷೆಯ ಮೇಲಿನ ಪ್ರೀತಿ, ಸಾಹಿತ್ಯದ ಮೇಲಿನ ಆಸಕ್ತಿ ಹಾಗೂ ಕನ್ನಡ ಸಂಸ್ಕೃತಿಯೊಂದಿಗಿನ ನಂಟನ್ನು ಉಳಿಸಿಕೊಂಡಿರುವ ಒಮಾನ್ ಕನ್ನಡಿಗರಲ್ಲಿ ಸಾಹಿತ್ಯಾಭಿರುಚಿ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಿರುವುದು ಸಂತಸದ ಸಂಗತಿಯಾಗಿದೆ. ಈ ನಿಟ್ಟಿನಲ್ಲಿ ರಂಗನಾಥ ಅವರ ಪ್ರಯತ್ನಗಳು ಮಹತ್ವದ ಪಾತ್ರ ವಹಿಸಿವೆ.

ಪ್ರತಿ ವರ್ಷದ ಪ್ರಕಟಣೆಯೂ ಹಿಂದಿನದಕ್ಕಿಂತ ಹೊಸತನ ಹಾಗೂ ವೈವಿಧ್ಯತೆಯಿಂದ ಮೂಡಿಬರುತ್ತಿರುವುದು ಈ ಬಳಗದ ಸಾಹಿತ್ಯಿಕ ಪ್ರಯತ್ನದ ಹೆಗ್ಗಳಿಕೆ. ಪ್ರತಿ ಕೃತಿಯಲ್ಲೂ ಅನುಭವಸಂಪನ್ನ ಹಳೆಯ ಬರಹಗಾರರ ಜತೆಗೆ ಹೊಸ ಪ್ರತಿಭೆಗಳೂ ಸೇರ್ಪಡೆಯಾಗುತ್ತಿರುವುದು ವಿಶೇಷ. ಇದರಿಂದ ಒಮಾನ್‌ನ ಕನ್ನಡ ಸಾಹಿತ್ಯ ವಲಯ ವಿಸ್ತಾರಗೊಳ್ಳುವುದರ ಜತೆಗೆ ಹೊಸ ತಲೆಮಾರಿನ ಬರಹಗಾರರಿಗೂ ತಮ್ಮ ಅಭಿವ್ಯಕ್ತಿಗೆ ಸೂಕ್ತ ವೇದಿಕೆ ದೊರೆಯುತ್ತಿದೆ.


‘ಕಸ್ತೂರಿ ಸಿಂಚನ’ ವಿಶೇಷಾಂಕಕ್ಕಾಗಿ ಲೇಖನ, ಕಥೆ ಹಾಗೂ ಕವನಗಳನ್ನು ಆಹ್ವಾನಿಸಿದಾಗ ಒಮಾನ್‌ನ 30ಕ್ಕೂ ಹೆಚ್ಚು ಬರಹಗಾರರು ತೋರಿದ ಉತ್ಸಾಹ ಮತ್ತು ಸ್ಪಂದನೆ ನಿಜಕ್ಕೂ ಶ್ಲಾಘನೀಯ. ಅದರಲ್ಲೂ ಅನೇಕ ಹೊಸ ಬರಹಗಾರರು ತಮ್ಮೊಳಗಿನ ಸೃಜನಶೀಲತೆಯನ್ನು ಮೊದಲ ಬಾರಿಗೆ ಅಕ್ಷರಗಳ ಮೂಲಕ ಅಭಿವ್ಯಕ್ತಿಸಿರುವುದು ವಿಶೇಷ ಮೆಚ್ಚುಗೆಗೆ ಪಾತ್ರವಾಗಿದೆ. ಈ ಕೃತಿಯ ಮೂಲಕ ಆರಂಭವಾಗುವ ಅವರ ಸಾಹಿತ್ಯ ಪಯಣ ಮುಂದಿನ ದಿನಗಳಲ್ಲಿ ಇನ್ನಷ್ಟು ಸಮೃದ್ಧವಾಗಿ ಬೆಳೆಯಲಿ ಎಂಬುದು ಪಿ.ಎಸ್. ರಂಗನಾಥ ಅವರ ಆಶಯವಾಗಿದೆ.

ಸಾಮಾನ್ಯವಾಗಿ ವಿದೇಶಗಳಲ್ಲಿರುವ ಕನ್ನಡ ಸಂಘ-ಸಂಸ್ಥೆಗಳ ಕಾರ್ಯಕ್ರಮಗಳಲ್ಲಿ ಹಾಡು, ನೃತ್ಯ ಸೇರಿದಂತೆ ಮನರಂಜನಾ ಚಟುವಟಿಕೆಗಳಿಗೆ ಹೆಚ್ಚಿನ ಆದ್ಯತೆ ದೊರೆಯುತ್ತದೆ. ಆದರೆ ಸಾಹಿತ್ಯ ಕ್ಷೇತ್ರಕ್ಕೂ ಸಮಾನ ಪ್ರಾಮುಖ್ಯತೆ ನೀಡಿ, ನಿರಂತರವಾಗಿ ಪುಸ್ತಕಗಳನ್ನು ಪ್ರಕಟಿಸಿ, ಲೋಕಾರ್ಪಣೆ ಮಾಡುವ ಮೂಲಕ ಒಮಾನ್ ಕನ್ನಡಿಗರು ಸಾಹಿತ್ಯ ಬಳಗ ವಿಶಿಷ್ಟ ಮಾದರಿಯನ್ನು ರೂಪಿಸಿದೆ. ವಿದೇಶಿ ನೆಲದಲ್ಲಿ ಕನ್ನಡ ಸಾಹಿತ್ಯದ ಬೆಳವಣಿಗೆಗೆ ಇಂತಹ ನಿರಂತರ ಪ್ರಯತ್ನಗಳು ಮಹತ್ವದ ಕೊಡುಗೆಯಾಗಿವೆ.


ಕನ್ನಡವೆಂದರೆ ಕೇವಲ ಸಂವಹನದ ಭಾಷೆಯಲ್ಲ; ಅದು ನಮ್ಮ ಸಂಸ್ಕೃತಿ, ಪರಂಪರೆ, ಭಾವನೆ ಮತ್ತು ಅಸ್ಮಿತೆಯ ಪ್ರತೀಕ. ಸಾವಿರಾರು ಮೈಲುಗಳ ದೂರದಲ್ಲಿದ್ದರೂ ಕನ್ನಡದ ಕಂಪನ್ನು ಹರಡುತ್ತಿರುವ ಒಮಾನ್ ಕನ್ನಡಿಗರ ಈ ಸಾಹಿತ್ಯಿಕ ಚಟುವಟಿಕೆಗಳು ನಿಜಕ್ಕೂ ಅಭಿನಂದನೀಯ. ವಿಶೇಷವಾಗಿ, ಹೊಸ ಬರಹಗಾರರನ್ನು ಗುರುತಿಸಿ ಪ್ರೋತ್ಸಾಹಿಸುವ ಮೂಲಕ ಕನ್ನಡ ಸಾಹಿತ್ಯದ ವ್ಯಾಪ್ತಿಯನ್ನು ವಿಸ್ತರಿಸುತ್ತಿರುವ ಶ್ರೀ ಪಿ.ಎಸ್. ರಂಗನಾಥ ಅವರ ಕನ್ನಡ ಸೇವೆ ಅನನ್ಯವಾದುದು.


‘ಕಸ್ತೂರಿ ಸಿಂಚನ’ದಂತಹ ಕೃತಿಗಳು ಒಮಾನ್‌ನ ಕನ್ನಡಿಗರ ಸಾಹಿತ್ಯಿಕ ಬದುಕಿನ ದಾಖಲೆಗಳಾಗಿ ಉಳಿಯುವುದರ ಜತೆಗೆ ಮುಂದಿನ ಪೀಳಿಗೆಗೆ ಕನ್ನಡ ಭಾಷೆ ಮತ್ತು ಸಂಸ್ಕೃತಿಯ ಮೇಲಿನ ಅಭಿಮಾನವನ್ನು ಪರಿಚಯಿಸುವ ಸೇತುವೆಗಳಾಗಲಿವೆ. ವೃತ್ತಿ ಬದುಕಿನ ಜವಾಬ್ದಾರಿಗಳ ನಡುವೆಯೂ ಕನ್ನಡದ ನುಡಿ, ನೆಲ, ಸಂಸ್ಕೃತಿ ಮತ್ತು ಸಾಹಿತ್ಯಕ್ಕಾಗಿ ತಮ್ಮ ಅಮೂಲ್ಯ ಸಮಯವನ್ನು ಮೀಸಲಿಡುತ್ತಿರುವ ರಂಗನಾಥ ಅವರ ಪ್ರಯತ್ನಗಳು ಇನ್ನಷ್ಟು ಕನ್ನಡಿಗರಿಗೆ ಪ್ರೇರಣೆಯಾಗಲಿ. ವಿದೇಶಿ ನೆಲದಲ್ಲೂ ಕನ್ನಡದ ದೀಪವನ್ನು ನಿರಂತರವಾಗಿ ಬೆಳಗಿಸುತ್ತಿರುವ ಈ ಸಾಹಿತ್ಯ ಸೇವೆ ಮತ್ತಷ್ಟು ವಿಸ್ತಾರಗೊಂಡು, ಕನ್ನಡ ಸಾಹಿತ್ಯದ ಕಂಪು ಜಗದಗಲ ಪಸರಿಸಲಿ ಎಂಬ ಆಶಯದೊಂದಿಗೆ ‘ಕಸ್ತೂರಿ ಸಿಂಚನ’ದ ಹೊಸ ಸಂಚಿಕೆಗೆ ಹಾರ್ದಿಕ ಶುಭಾಶಯಗಳು.

#Oman_Kannadigaru #Muscat #Oman #Kannada #Karnataka #Bengaluru #Bangalore #kasturi_sinchana #ಕಸ್ತೂರಿ_ಸಿಂಚನ #ಪಿ_ಎಸ್_ರಂಗನಾಥ #ಒಮಾನ್_ಕನ್ನಡಿಗ 


ಶುಕ್ರವಾರ, ನವೆಂಬರ್ 13, 2026

ಕಸ್ತೂರಿ ಸಿಂಚನ - ಒಮಾನ್ ಕನ್ನಡಿಗರು ಕರ್ನಾಟಕ ರಾಜ್ಯೋತ್ಸವ ವಿಶೇಷಾಂಕ – 2026

 

ಒಮಾನ್ ಕನ್ನಡಿಗರು ಸಾಹಿತ್ಯ ಬಳಗದ ವತಿಯಿಂದ ಪ್ರಕಟಗೊಂಡಿರುವ  

ಕಸ್ತೂರಿ ಸಿಂಚನ ಒಮಾನ್ ಕನ್ನಡಿಗರು ರಾಜ್ಯೋತ್ಸವ ವಿಶೇಷಾಂಕ – 2026 

ಅನ್ನು ಓದಲು ಈ ಕೆಳಗಿನ ಲಿಂಕ್ ಅನ್ನು ಕ್ಲಿಕ್ ಮಾಡಿ.






ಕಸ್ತೂರಿ ಸಿಂಚನ - ಒಮಾನ್ ಕನ್ನಡಿಗರು ಕರ್ನಾಟಕ ರಾಜ್ಯೋತ್ಸವ ವಿಶೇಷಾಂಕ – 2026

Click the below link to open in separate Page https://anyflip.com/mgolt/napr/

Karnataka Rajyotsava Visheshanka 2025

ಗುರುವಾರ, ಸೆಪ್ಟೆಂಬರ್ 3, 2026

ಪ್ರೇಕ್ಷಣೀಯ ಸ್ಥಳಗಳ ಆಗರ ಮೊಳಕಾಲ್ಮೂರು

ಆಂಧ್ರಪ್ರದೇಶ ಗಡಿಯಲ್ಲಿರುವ ಮೊಳಕಾಲ್ಮುರು ತಾಲ್ಲೂಕು ತನ್ನ ಮಡಿಲಲ್ಲಿ ಹಲವು ಪ್ರವಾಸಿ ತಾಣಗಳನ್ನು ಹುದುಗಿಸಿಟ್ಟುಕೊಂಡಿದೆ. ಹೊರ ಜಗತ್ತಿಗೆ ತಿಳಿಯದ ಹಲವು ತಾಣಗಳು ಇಲ್ಲಿದ್ದು ಇಡೀ ತಾಲ್ಲೂಕು ಹುಡುಕಾಟದ ತಾಣವಾಗಿದೆ.

ಪ್ರಾಚೀನ ಕಾಲದ ಹಲವು ಪ್ರವಾಸಿ ತಾಣಗಳು ಜಿಲ್ಲೆಯಲ್ಲಿ ಪ್ರಾಗೈತಿಹಾಸಿಕ ಹಿನ್ನೆಲೆ ಹೊಂದಿವೆ. ಪ್ರಾಚೀನ ಶಿಲಾಯುಗ ಕಾಲಘಟ್ಟದ ಅನೇಕ ಐತಿಹ್ಯ ಘಟನೆಗಳಿಗೆ ತಾಲ್ಲೂಕು ಸಾಕ್ಷಿಯಾಗಿದೆ. ಇಲ್ಲಿನ ಬೆಟ್ಟಗಳಲ್ಲಿ ಶಿಲಾಯುಗದಲ್ಲಿ ಮಾನವನ ಜನವಸತಿ ಇದ್ದ ಸತ್ಯ ಹುದುಗಿದೆ. ಇಂತಹ ಪ್ರಾಗೈತಿಹಾಸ ಹೊಂದಿರುವ ಈ ತಾಣ ಏಷ್ಯಾದಲ್ಲೇ 2ನೇ ಸ್ಥಾನ ಪಡೆದಿದೆ. ಅಶೋಕ ಸಿದ್ದಾಪುರದಲ್ಲಿರುವ ಅಶೋಕ ಶಾಸನ, ಜೈನಬಸದಿಗಳು ಇಲ್ಲಿಯ ವಿಶೇಷ. ಆಗಿನ ಕಾಲದಲ್ಲಿ ನಡೆಯುತ್ತಿದ್ದ ವಾಣಿಜ್ಯ ಚಟುವಟಿಕೆಗಳು ತಾಲ್ಲೂಕಿನ ಹೆಮ್ಮೆಯನ್ನು ದುಪ್ಪಟ್ಟು ಮಾಡಿವೆ. ಪಠ್ಯಗಳಲ್ಲಿ ಈ ಸ್ಥಳದ ಉಲ್ಲೇಖವಾಗಿದೆ.

‘ಹೊಸ ತಾಣಗಳನ್ನು ಅರಸಲು ವಿದೇಶಿ ಪ್ರವಾಸಿಗರು ಇಲ್ಲಿಗೆ ಬಂದು ಹೋಗುವುದು ಈ ಸ್ಥಳದ ಶ್ರೀಮಂತಿಕೆಗೆ ಹಿಡಿದ ಕನ್ನಡಿಯಾಗಿದೆ’ ಎನ್ನುತ್ತಾರೆ ಸಾಹಿತಿ ರಾಂಪುರದ ರಂಗನಾಥ್‌.


ಕೊಂಡ್ಲಹಳ್ಳಿಯಲ್ಲಿರುವ ಬಿಳಿನೀರು ಚಿಲುಮೆ ಪುಣ್ಯಕ್ಷೇತ್ರವು ನಾಯಕನಹಟ್ಟಿಗೆ ಗುರು ತಿಪ್ಪೇರುದ್ರಸ್ವಾಮಿಯವರು ಆಂಧ್ರಪ್ರದೇಶದಿಂದ ಹೋಗುವಾಗ ಊಟಕ್ಕೆ ತಂಗಿದ್ದ ಸ್ಥಳವಾಗಿದೆ. ಕುಡಿಯುವ ನೀರಿಗಾಗಿ ಬೆತ್ತದಿಂದ ನೆಲಮೀಟಿ ನೀರು ಹೊರ ತೆಗೆದರು ಎಂಬ ಐತಿಹ್ಯವಿದ್ದು ಈ ಸ್ಥಳದಲ್ಲಿ ಪುಷ್ಕರಣಿ ಕಟ್ಟಿಸಿ ಪೂಜೆ ಮಾಡಲಾಗುತ್ತಿದೆ. ದೇವಸ್ಥಾನವೂ ಉತ್ತಮವಾಗಿದ್ದು ನಿತ್ಯ ನೂರಾರು ಭಕ್ತರು ಭೇಟಿ ನೀಡುತ್ತಾರೆ. ಇಲ್ಲಿನ ಕಂಬಳಿ, ರೇಷ್ಮೆಸೀರೆ ನೇಯ್ಗೆ ರಾಷ್ಟ್ರ ಖ್ಯಾತಿ ಪಡೆದಿವೆ.

ಮೊಳಕಾಲ್ಮುರು ಪಟ್ಟಣ ಬಳಿ ಗೋಲಗುಂಬಸ್‌ ತರಹದ ಕೂಗು ಬಂಡೆಯಿದ್ದು ಕೂಗಿದಲ್ಲಿ ಮೂರು ಭಾರಿ ಪ್ರತಿಧ್ವನಿ ಕೇಳುತ್ತದೆ. ಪ್ರಕೃತಿದತ್ತವಾಗಿ ದೊರೆಯುವ ಸೀತಾಫಲ ಇಲ್ಲಿನ ಮೋಹಕ ಕುಟ್ಟು ರೇಷ್ಮೆಸೀರೆಯಷ್ಟೇ ಖ್ಯಾತಿ ಪಡೆದಿದೆ. ಇಲ್ಲಿ ಸಿಗುವ ರುಚಿಕರವಾದ, ಬುಟ್ಟಿ ಲೆಕ್ಕದ ಸೀತಾಫಲ ರುಚಿ ಬಲು ವಿಶೇಷವಾದುದು. ಪಟ್ಟಣದಿಂದ 7 ಕಿ.ಮೀ ದೂರದಲ್ಲಿ ರಂಗಯ್ಯನದುರ್ಗ ಜಲಾಶಯವಿದ್ದು ಒಂದು ದಿನದ ಪ್ರವಾಸಕ್ಕೆ ಬಲು ಸೂಕ್ತವಾದುದು.

ನುಂಕಿಮಲೆ ಬೆಟ್ಟವು ರಾಷ್ಟ್ರೀಯ ಹೆದ್ದಾರಿ 150ರಲ್ಲಿರುವ ಕಾಟನಾಯಕನಹಳ್ಳಿಯಿಂದ 4 ಕಿ.ಮೀ ಹೋದಲ್ಲಿ ನುಂಕಿಮಲೆ ಬೆಟ್ಟ ಸಿಗುತ್ತದೆ. ಸಿದ್ದೇಶ್ವರ ಸ್ವಾಮಿ ನುಂಕಪ್ಪ ಸ್ವಾಮಿ, ಹರಳಯ್ಯ, ಮಲ್ಲಿಕಾರ್ಜುನ ಸ್ವಾಮಿ, ದೇವಸ್ಥಾನಗಳಿವೆ. ಮಳೆಗಾದಲ್ಲಿ ಮಲೆನಾಡ ‘ಘಾಟ್‌’ಅನುಭವ ಇಲ್ಲಿ ಸಿಗುತ್ತದೆ. ಮಯೂರವರ್ಮ ಆಡಳಿತ ಅವಧಿಯಲ್ಲಿ ಇಲ್ಲಿನ ಜೀರ್ಣೋದ್ಧಾರ ಕಾರ್ಯಗಳಾಗಿ. ‘ನಾಥ’ಪಂಥಕ್ಕೆ ಸೇರಿದ ಮಠದಲ್ಲಿ ಗೋಶಾಲೆಯೂ ಇದೆ. ರಾಜ್ಯದಲ್ಲಿರುವ 2 ಅಶೋಕನ ಶಾಸನಗಳ ಪೈಕಿ ಆಶೋಕ ಸಿದ್ದಾಪುರದಲ್ಲಿ ಒಂದಿದೆ. ದೊಡ್ಡ ಬಂಡೆ ಮೇಲೆ ಶಾಸನ ಕೆತ್ತಲಾಗಿದೆ. ಜತನದಿಂದ ಬಂಡೆ ಸಂರಕ್ಷಣೆ ಮಾಡಲಾಗಿದೆ. ಮಾಹಿತಿ ಫಲಕವನ್ನು ಅಳವಡಿಸಲಾಗಿದೆ. ಅದರ ಸಮೀಪ ಜೈನಬಸದಿಗಳಿವೆ. ಸಮೀಪದ ರೊಪ್ಪದಲ್ಲಿ ಗ್ರಾಮವಿದ್ದು ಶಿಲಾಯುಗ ಅವಧಿಯ ಸಮಾಧಿಗಳಿದ್ದು ಪುರಾತತ್ವ ಇಲಾಖೆ ಸಂರಕ್ಷಣೆ ಮಾಡುವ ಜತೆಗೆ ಇವುಗಳ ವೈಜ್ಞಾನಿಕ ಮಾಹಿತಿಗಾಗಿ ಅಮೆರಿಕ ಸಹಭಾಗಿತ್ವದಲ್ಲಿ ಉತ್ಖನ ಕಾರ್ಯ ನಡೆಯುತ್ತಿದೆ.

ಇಲ್ಲಿಂದ 2 ಕಿ.ಮೀ ದೂರದ ಕಾಡು ಸಿದ್ದಾಪುರದಲ್ಲಿ ಒಂದೇ ಗುಂಡಿಯಲ್ಲಿ ವಿಸ್ಮಯಕಾರಿಯಾಗಿ ಗ್ರಾಮದ ಕಾಡು ಕುರುಬರ ಜನಾಂಗದವರು ಯಾರೇ ಸತ್ತರೂ ಒಂದೇ ಗುಂಡಿಯಲ್ಲಿ ಹೂಳುವ ಅಚ್ಚರಿ ಸಂಗತಿಯಿದೆ. ಇದು ವಿಶ್ವದ ಬೇರೆ ಎಲ್ಲೂ ಕಂಡುಬಂದಿಲ್ಲ. ಸಾವಿನ ಮುನ್ಸೂಚನೆಯೂ ಗುಂಡಿಯಿಂದ ದೊರೆಯುತ್ತದೆ. ದೇವಸಮುದ್ರ ಹೋಬಳಿಯ ರಾಮೇಶ್ವರ ಬೆಟ್ಟವು ರಾಮಾಯಣ ಐತಿಹ್ಯಕ್ಕೆ ಖ್ಯಾತಿಯಾಗಿದೆ.

ರಾವಣ ಸೀತೆಯನ್ನು ಅಪಹರಣ ಮಾಡಿಕೊಂಡು ಹೋಗುವಾಗ ಅಡ್ಡ ಬಂದ ಜಟಾಯು ಪಕ್ಷಿ ಮೇಲೆ ದಾಳಿ ಮಾಡಿದಾಗ ಪಕ್ಷಿಯು ಈ ಬೆಟ್ಟದ ಮೇಲೆ ಬಿದ್ದಿತು. ನಂತರ ರಾಮ ಬಂದು ಪಕ್ಷಿಗೆ ಮೋಕ್ಷ ನೀಡಿದನೆಂದೂ, ಪಕ್ಷಿಯ ಕೋರಿಕೆಯಂತೆ ಲಿಂಗ ಪ್ರತಿಷ್ಠಾಪನೆ ಮಾಡಿದ ಎಂಬ ಐತಿಹ್ಯವಿದೆ. 101 ಸಣ್ಣ ದೇವಸ್ಥಾನಗಳು ಬೆಟ್ಟದ ಮೇಲಿವೆ. ಬೆಟ್ಟಕ್ಕೆ ರೋಪ್‌ ವೇ ಮಾಡುವ ಪ್ರಸ್ತಾವವೂ ಇದೆ. ಆದರೆ ಇಲ್ಲಿಯವರೆಗೆ ಕಾರ್ಯರೂಪಕ್ಕೆ ಬಂದಿಲ್ಲ.

ತಾಲ್ಲೂಕಿನ ಬಾಂಡ್ರಾವಿ ಅರಣ್ಯವು ಸಾವಿರಾರು ಹೆಕ್ಟೇರ್‌ನಲ್ಲಿದ್ದು, ಮಲೆನಾಡ ಅನುಭವ ನೀಡುತ್ತದೆ. ಇಲ್ಲಿನ ವ್ಯೂ ಪಾಯಿಂಟ್‌, ಕೆಳಗಿನ ಕಣಿವೆಯ ಜಲಪಾತ, ಬಾಂಡ್ರಾವಿಯಲ್ಲಿ 8ನೇ ಶತಮಾನದಲ್ಲಿ ವ್ಯಾಸರಾಯರು ಪ್ರತಿಷ್ಠಾಪಿಸಿರುವ ಆಂಜನೇಯ ಸ್ವಾಮಿ ದೇವಸ್ಥಾನ ಹಲವು ಜಿಲ್ಲೆಯಲ್ಲಿ ಭಕ್ತರನ್ನು ಹೊಂದಿದೆ.


ಬುಧವಾರ, ಆಗಸ್ಟ್ 26, 2026

ಪೋರ್ಚುಗೀಸರನ್ನ ಓಡಿಸಿ ದೇಶ ಕಟ್ಟಿದ್ದ ಒಮಾನಿಗಳು

ಆತ್ಮೀಯರೇ ನಮಸ್ಕಾರ 🙏💐

ಪರಕೀಯರು, ನಮ್ಮ ಭಾರತವನ್ನು ನೂರಾರು ವರ್ಷಗಳ ಕಾಲ ಆಳಿದ್ದರು. ಒಂದು ವೇಳೆ ನಾವು ಪೋರ್ಚುಗೀಸರನ್ನ ಮಟ್ಟ ಹಾಕಿದ್ದಿದ್ದರೆ, ಬ್ರಿಟಿಷರು ನಮ್ಮ ಭಾರತಕ್ಕೆ ಬರುತ್ತಿರಲಿಲ್ಲ.

ಆದರೆ ಒಮಾನಿಗಳು, ಆ ದಬ್ಬಾಳಿಕೆಯನ್ನು ಹಲವಾರು ವರ್ಷಗಳ ಕಾಲ ಸಹಿಸಿಕೊಂಡು ನಂತರ ಅವರ ವಿರುದ್ಧ ತಿರುಗಿಬಿದ್ದರು.

ಪೋರ್ಚುಗೀಸರನ್ನ ಓಡಿಸಿ ದೇಶ ಕಟ್ಟಿದ್ದ ಒಮಾನಿಗಳು, ಐತಿಹಾಸಿಕ ಕುತೂಹಲಕಾರಿ ಲೇಖನ, ಕನ್ನಡ ಪ್ರಭ ಎನ್ನಾರೈ‌ ಎಡಿಶನ್‌ ನಲ್ಲಿ ಪ್ರಕಟವಾಗಿದೆ. ಓದಿ ನಿಮ್ಮ ಪ್ರತಿಕ್ರಿಯೆ ನೀಡಿ.

ಧನ್ಯವಾದಗಳು

✍🏻ಪಿ.ಎಸ್.ರಂಗನಾಥ.
ಮಸ್ಕತ್, ಒಮಾನ್ ರಾಷ್ಟ್ರ

#Oman #Muscat #Portuguse #vascodagama


ಶುಕ್ರವಾರ, ಆಗಸ್ಟ್ 14, 2026

ಸ್ವಾತಂತ್ರ್ಯವೋ ಅಥವಾ ಸ್ವೇಚ್ಛಾಚಾರವೋ?

ಸ್ವಾತಂತ್ರ್ಯದ ಸಾರ್ಥಕತೆ, ಮರೆಯಾದ ವೀರರು ಮತ್ತು ಇಂದಿನ ವಾಸ್ತವ: ಒಂದು ವಿಶ್ಲೇಷಣೆ

ಇಂದು ನಾವು ನಮ್ಮ ದೇಶದ ಸ್ವಾತಂತ್ರ್ಯ ದಿನಾಚರಣೆಯ ಸಂಭ್ರಮದಲ್ಲಿದ್ದೇವೆ. ಎಂಟು ದಶಕಗಳ ಈ ಪಯಣ ಕೇವಲ ಸಂಭ್ರಮದ ದಿನವಷ್ಟೇ ಅಲ್ಲ; ಬದಲಾಗಿ, ನಮ್ಮ ದೇಶಕ್ಕಾಗಿ ಪ್ರಾಣತೆತ್ತ ಅಸಂಖ್ಯಾತ ಮಹಾನ್ ನಾಯಕರ ತ್ಯಾಗ, ಬಲಿದಾನ ಮತ್ತು ಹೋರಾಟಗಳನ್ನು ಸ್ಮರಿಸುವ ಪವಿತ್ರ ದಿನ. ಆ ಮಹನೀಯರ ನಿರಂತರ ತ್ಯಾಗದ ಪ್ರತಿಫಲವೇ ಇಂದು ನಾವು ಅನುಭವಿಸುತ್ತಿರುವ ಈ ಸ್ವಾತಂತ್ರ್ಯ. ಆದರೆ, ಈ ಹೊತ್ತಿನಲ್ಲಿ ನಾವು ನಿಜವಾದ ಸ್ವಾತಂತ್ರ್ಯದ ಹಾದಿಯಲ್ಲಿದ್ದೇವೆಯೇ ಅಥವಾ ದಿಕ್ಕು ತಪ್ಪಿದ್ದೇವೆಯೇ ಎಂಬ ಗಂಭೀರ ಪ್ರಶ್ನೆ ನಮ್ಮೆದುರು ನಿಲ್ಲುತ್ತದೆ.

ಇತಿಹಾಸದ ಪುಟಗಳಲ್ಲಿ ಮರೆಯಾದ, ನೇಣುಗಂಬಕ್ಕೇರಿದ ಅನಾಮಧೇಯ ವೀರರು ಸ್ವಾತಂತ್ರ್ಯದ ಇತಿಹಾಸವನ್ನು ಮೆಲುಕು ಹಾಕುವಾಗ ಕೇವಲ ಬೆರಳೆಣಿಕೆಯ ನಾಯಕರ ಹೆಸರುಗಳು ಮಾತ್ರ ಮುನ್ನೆಲೆಗೆ ಬರುತ್ತವೆ. ಆದರೆ, ಯಾವುದೇ ಪ್ರಚಾರದ ಹಂಗಿಲ್ಲದೆ, ಕೇವಲ ಮಾತೃಭೂಮಿಯ ಮೇಲಿನ ಭಕ್ತಿಗಾಗಿ ನಗುನಗುತ್ತಾ ನೇಣುಗಂಬಕ್ಕೇರಿದ ಅದೆಷ್ಟೋ ಮಹನೀಯರಿದ್ದಾರೆ. ಸ್ವಾತಂತ್ರ್ಯದ ಈ ಅಮೃತ ಗಳಿಗೆಯಲ್ಲಿ ಅವರ ತ್ಯಾಗವನ್ನು ಸ್ಮರಿಸುವುದು ನಮ್ಮ ಆದ್ಯ ಕರ್ತವ್ಯ:

  • ನರಗುಂದದ ಬಾಬಾಸಾಹೇಬ (ಭಾಸ್ಕರರಾವ್ ಭಾವೆ): ಬ್ರಿಟಿಷರ ದತ್ತುಮಕ್ಕಳಿಗೆ ಹಕ್ಕಿಲ್ಲ (Doctrine of Lapse) ಎಂಬ ನೀತಿಯನ್ನು ತೀವ್ರವಾಗಿ ವಿರೋಧಿಸಿ ಸಿಡಿದೆದ್ದ ಕರ್ನಾಟಕದ ಅಪ್ರತಿಮ ವೀರ. ಬ್ರಿಟಿಷರ ವಿರುದ್ಧ ಕೆಚ್ಚೆದೆಯಿಂದ ಸಶಸ್ತ್ರ ಹೋರಾಟ ಮಾಡಿದ ಇವರನ್ನು ಸೆರೆಹಿಡಿದ ಬ್ರಿಟಿಷರು, ಬೆಳಗಾವಿಯಲ್ಲಿ ನಿರ್ದಯವಾಗಿ ಗಲ್ಲಿಗೇರಿಸಿದರು.
  • ಹಲಗಲಿಯ ಬೇಡರು: ೧೮೫೭ರಲ್ಲಿ ಬ್ರಿಟಿಷರು ತಂದ 'ನಿಶಸ್ತ್ರೀಕರಣ ಕಾಯ್ದೆ'ಯನ್ನು (ತಮ್ಮ ಸಾಂಪ್ರದಾಯಿಕ ಶಸ್ತ್ರಾಸ್ತ್ರಗಳನ್ನು ಒಪ್ಪಿಸುವ ನಿಯಮ) ಧಿಕ್ಕರಿಸಿ, ಪ್ರಾಣದ ಹಂಗುತೊರೆದು ಹೋರಾಡಿದವರು ಮುಧೋಳ ತಾಲೂಕಿನ ಹಲಗಲಿಯ ಬೇಡರು. ಈ ಬಂಡಾಯವನ್ನು ಕ್ರೂರವಾಗಿ ಹತ್ತಿಕ್ಕಿದ ಬ್ರಿಟಿಷರು ಜಡಗ, ಬಾಲ, ರಾಮ ಮುಂತಾದ ಅಮಾಯಕ ವೀರರನ್ನು ಸಾರ್ವಜನಿಕವಾಗಿ ಮರಕ್ಕೆ ನೇತುಹಾಕಿ ಗಲ್ಲಿಗೇರಿಸಿದರು.
  • ಕರ್ತಾರ್ ಸಿಂಗ್ ಸರಾಭಾ: ಭಾರತದ ಸ್ವಾತಂತ್ರ್ಯಕ್ಕಾಗಿ ಅಮೆರಿಕದಲ್ಲಿ 'ಗದರ್ ಪಾರ್ಟಿ' ಕಟ್ಟಿ ಬ್ರಿಟಿಷರ ವಿರುದ್ಧ ಸಿಡಿದೆದ್ದ ಯುವಕ. ಕೇವಲ ೧೯ನೇ ವಯಸ್ಸಿಗೆ ಲಾಹೋರ್ ಜೈಲಿನಲ್ಲಿ ನಗುನಗುತ್ತಾ ನೇಣುಗಂಬ ಏರಿದ ಇವರು, ಕ್ರಾಂತಿಕಾರಿ ಭಗತ್ ಸಿಂಗ್ ಅವರಿಗೇ ಆದರ್ಶ ಗುರುವಾಗಿದ್ದರು ಎಂಬುದು ಬಹುತೇಕರಿಗೆ ತಿಳಿದಿಲ್ಲ.
  • ಮಾಸ್ಟರ್ ದಾ ಸೂರ್ಯ ಸೇನ್: ಬಂಗಾಳದ ಚಿತ್ತಗಾಂಗ್‌ನಲ್ಲಿ ಶಾಲಾ ಶಿಕ್ಷಕರಾಗಿದ್ದ ಇವರು, ಯುವಕರ ಪಡೆಯನ್ನು ಕಟ್ಟಿ ಬ್ರಿಟಿಷರ ಶಸ್ತ್ರಾಸ್ತ್ರಗಳ ಉಗ್ರಾಣದ ಮೇಲೆಯೇ ದಾಳಿ ಮಾಡಿದ ಅಪ್ರತಿಮ ಕ್ರಾಂತಿಕಾರಿ. ಇವರನ್ನು ಸೆರೆಹಿಡಿದ ಬ್ರಿಟಿಷರು, ಹಲ್ಲುಗಳನ್ನು ಕಿತ್ತು, ಮೂಳೆಗಳನ್ನು ಮುರಿದು ಅಮಾನುಷವಾಗಿ ಚಿತ್ರಹಿಂಸೆ ನೀಡಿ, ಪ್ರಜ್ಞಾಹೀನ ಸ್ಥಿತಿಯಲ್ಲೇ ಗಲ್ಲಿಗೇರಿಸಿದರು.
  • ಅಶ್ಫಾಖುಲ್ಲಾ ಖಾನ್ ಮತ್ತು ರಾಮ್ ಪ್ರಸಾದ್ ಬಿಸ್ಮಿಲ್: ಕಾಕೋರಿ ರೈಲು ದರೋಡೆ ಪ್ರಕರಣದಲ್ಲಿ ಬ್ರಿಟಿಷರ ನಿದ್ದೆಗೆಡಿಸಿದ ಈ ಕ್ರಾಂತಿಕಾರಿ ಸ್ನೇಹಿತರನ್ನು ಬ್ರಿಟಿಷರು ಪ್ರತ್ಯೇಕ ಜೈಲುಗಳಲ್ಲಿ ನೇಣಿಗೇರಿಸಿದರು. "ಸರ್ಫರೋಶಿ ಕಿ ತಮನ್ನಾ" ಎಂಬ ಕ್ರಾಂತಿಗೀತೆಯನ್ನು ಹಾಡುತ್ತಾ ಅವರು ಮಾಡಿದ ಬಲಿದಾನ ಇಂದಿಗೂ ರೋಮಾಂಚನಕಾರಿ.

ಸ್ವಾತಂತ್ರ್ಯವೋ ಅಥವಾ ಸ್ವೇಚ್ಛಾಚಾರವೋ? ಇಂತಹ ಅಸಂಖ್ಯಾತ ಅನಾಮಧೇಯ ವೀರರ ರಕ್ತದಿಂದ ಬರೆದ ಈ ಸ್ವಾತಂತ್ರ್ಯವನ್ನು ನಾವಿಂದು ಹೇಗೆ ಬಳಸಿಕೊಳ್ಳುತ್ತಿದ್ದೇವೆ? ಇಂದಿನ ಸಮಾಜವನ್ನು ಸೂಕ್ಷ್ಮವಾಗಿ ಗಮನಿಸಿದರೆ, ನಾವೆಲ್ಲರೂ ಸ್ವಾತಂತ್ರ್ಯದ ಹೆಸರಿನಲ್ಲಿ 'ಸ್ವೇಚ್ಛಾಚಾರ'ದಲ್ಲಿ ಮುಳುಗಿದ್ದೇವೆಯೇನೋ ಎನಿಸುತ್ತದೆ. ನಮ್ಮನ್ನಾಳುತ್ತಿರುವ ಅತಿಯಾದ ಮತ್ತು ಅನಿರ್ಬಂಧಿತ ಸ್ವಾತಂತ್ರ್ಯವು ಸಮಾಜವನ್ನು ಪ್ರಪಾತದತ್ತ ತಳ್ಳುತ್ತಿದೆ. ನಾವು ನಮ್ಮದೇ ವ್ಯವಸ್ಥೆಯನ್ನು ಹೇಗೆ ದುರ್ಬಳಕೆ ಮಾಡಿಕೊಳ್ಳುತ್ತಿದ್ದೇವೆ ಎಂಬುದನ್ನು ವಿದೇಶಿಯರು ಸಹ ಸೂಕ್ಷ್ಮವಾಗಿ ಗಮನಿಸುತ್ತಿದ್ದಾರೆ.

ರಾಜಕೀಯ ಮತ್ತು ಭ್ರಷ್ಟಾಚಾರದ ಕರಾಳ ಮುಖ

  • ಜವಾಬ್ದಾರಿರಹಿತ ಅಭಿವ್ಯಕ್ತಿ ಸ್ವಾತಂತ್ರ್ಯ: ಪ್ರಜಾಪ್ರಭುತ್ವದಲ್ಲಿ ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ಬೆಲೆ ಇದೆ. ಆದರೆ ಇಂದು ರಾಜಕೀಯ ನಾಯಕರು, ಪ್ರತಿಪಕ್ಷಗಳು ಹಾಗೂ ಕೆಲವು ಹೋರಾಟಗಾರರು ಯಾವುದೇ ಮಿತಿಯಿಲ್ಲದೆ, ಜವಾಬ್ದಾರಿಯಿಲ್ಲದೆ ಮಾತನಾಡುತ್ತಿರುವುದು ವ್ಯವಸ್ಥೆಯ ಅಣಕವಾಗಿದೆ. ಸೈದ್ಧಾಂತಿಕ ವಿರೋಧಗಳನ್ನು ಬಿಟ್ಟು ವೈಯಕ್ತಿಕ ತೇಜೋವಧೆಗೆ ಇಳಿಯುತ್ತಿರುವುದು ವಿಷಾದನೀಯ.
  • ಬೇರೂರಿರುವ ಭ್ರಷ್ಟಾಚಾರ: ಭ್ರಷ್ಟಾಚಾರವು ಸಮಾಜದ ಪ್ರತಿಯೊಂದು ಸ್ತರವನ್ನೂ ವ್ಯಾಪಿಸಿದೆ. ಸರ್ಕಾರಿ ಕಚೇರಿಗಳು, ದಲ್ಲಾಳಿಗಳ ಹಸ್ತಕ್ಷೇಪ, ಗುತ್ತಿಗೆದಾರರ ವ್ಯವಸ್ಥೆ – ಹೀಗೆ ಎಲ್ಲೆಡೆಯೂ ಭ್ರಷ್ಟಾಚಾರ ತಾಂಡವವಾಡುತ್ತಿದೆ. ಎಷ್ಟೇ ಕಠಿಣ ಕಾನೂನುಗಳನ್ನು ತಂದರೂ, ಆ ಕಾನೂನುಗಳ ಕಣ್ಣಿಗೆ ಮಣ್ಣೆರಚಿ ನುಣುಚಿಕೊಳ್ಳುವವರೇ ಹೆಚ್ಚಾಗಿದ್ದಾರೆ.

ಅಧಿಕಾರದ ದರ್ಪ ಮತ್ತು ಅಹಂಕಾರ ಇಂದು ಅಧಿಕಾರದ ಮದ ಮತ್ತು ದರ್ಪ ಜನಸಾಮಾನ್ಯರನ್ನು ಬೆಚ್ಚಿಬೀಳಿಸುತ್ತಿದೆ. ಜನಪ್ರತಿನಿಧಿಗಳು ಹಾಗೂ ಸರ್ಕಾರಿ ಅಧಿಕಾರಿಗಳು ಅಧಿಕಾರದ ಅಹಂಕಾರ ಪ್ರದರ್ಶನವಾಗುತ್ತಿರುವುದು ನಿಜಕ್ಕೂ ಆತಂಕಕಾರಿ. ಇತ್ತೀಚೆಗೆ ಮಾಲೂರಿನಲ್ಲಿ ನಡೆದಂತಹ ಘಟನೆಗಳು ಇದಕ್ಕೆ ತಾಜಾ ಉದಾಹರಣೆಯಾಗಿದ್ದು, ಇವು ವ್ಯವಸ್ಥೆಯ ಮೇಲಿನ ನಂಬಿಕೆಯನ್ನು ಬುಡಮೇಲು ಮಾಡುತ್ತವೆ.

ಯುವ ಪೀಳಿಗೆಯ ಮೇಲಿರುವ ಜವಾಬ್ದಾರಿ ಖಂಡಿತವಾಗಿಯೂ ನಾವು ಇಂದು ನೋಡುತ್ತಿರುವುದು ಸ್ವಾತಂತ್ರ್ಯವಲ್ಲ, ಅದು ಅತಿಯಾದ ಸ್ವೇಚ್ಛಾಚಾರ. ಈ ವ್ಯವಸ್ಥೆಯನ್ನು ಹೀಗೆಯೇ ಬಿಟ್ಟರೆ ಮುಂದಿನ ದಿನಗಳು ಮತ್ತಷ್ಟು ಕಠಿಣವಾಗಲಿವೆ.

  • ಈ ಅಸಮತೋಲನವನ್ನು ಸರಿಪಡಿಸುವ ಅತಿ ದೊಡ್ಡ ಹೊಣೆಗಾರಿಕೆ ಇಂದಿನ ಯುವ ಪೀಳಿಗೆಯ ಮೇಲಿದೆ.
  • ಸಮಾಜದ ಪ್ರತಿಯೊಬ್ಬ ಪ್ರಜೆಯೂ ಎಚ್ಚೆತ್ತುಕೊಂಡು, ಈ ಸ್ವೇಚ್ಛಾಚಾರವನ್ನು ನಿರ್ಬಂಧಿಸಿ, ಅನಾಮಧೇಯ ಕ್ರಾಂತಿಕಾರಿಗಳು ಕಂಡಿದ್ದ ನೈಜ ಸ್ವಾತಂತ್ರ್ಯದ ಮೌಲ್ಯಗಳನ್ನು ಮರುಸ್ಥಾಪಿಸುವ ಕೆಲಸವನ್ನು ಒಗ್ಗಟ್ಟಿನಿಂದ ಮಾಡಬೇಕಿದೆ.

 ದೇಶದ ಸ್ವಾತಂತ್ರ್ಯಕ್ಕಾಗಿ ತಮ್ಮ ಸರ್ವಸ್ವವನ್ನೂ ತ್ಯಾಗ ಮಾಡಿದ, ನೇಣುಗಂಬಕ್ಕೆ ಮುತ್ತಿಕ್ಕಿದ ಆ ಎಲ್ಲಾ ಅನಾಮಿಕ ಮಹಾತ್ಮರು ಮತ್ತು ಹುತಾತ್ಮರಿಗೆ ನಮ್ಮ ಕೃತಜ್ಞತಾಪೂರ್ವಕ ನಮನಗಳನ್ನು ಸಲ್ಲಿಸೋಣ. ಕೇವಲ ಆಚರಣೆಗೆ ಸೀಮಿತವಾಗದೆ, ಅವರು ತಂದುಕೊಟ್ಟ ಸ್ವಾತಂತ್ರ್ಯವನ್ನು ಉಳಿಸಿ, ಬೆಳೆಸುವ ಜವಾಬ್ದಾರಿಯುತ ನಾಗರಿಕರಾಗಿ ಸಮಾಜವನ್ನು ತಿದ್ದುವ ಪಣ ತೊಡೋಣ.

ಎಲ್ಲಾ ದೇಶಬಾಂಧವರಿಗೂ ಸ್ವಾತಂತ್ರ್ಯ ದಿನಾಚರಣೆಯ ಹಾರ್ದಿಕ ಶುಭಾಶಯಗಳು. ಜೈ ಹಿಂದ್, ಜೈ ಭಾರತ್, ವಂದೇ ಮಾತರಂ!

ಬರಹ:

ಪಿ.ಎಸ್.ರಂಗನಾಥ

ಮಸ್ಕತ್, ಒಮಾನ್ ರಾಷ್ಟ್ರ

Click below headings