*"ಕುಬೂಸ್" ಎನ್ನುವ ಅರೇಬಿಕ್ ಬ್ರೆಡ್ ಗಲ್ಫ್ ರಾಷ್ಟ್ರಗಳ "ಅನ್ನಭಾಗ್ಯ"*

 ಬಡವ ಬಲ್ಲಿದ ಎನ್ನದೆ ಹಸಿದ ಹೊಟ್ಟೆ ತುಂಬಿಸುವ  "ಕುಬೂಸ್"

 

ಮೂರು ಹೊತ್ತು ಕುಬೂಸ್ ತಿಂದು ಹಣ ಉಳಿಸಿ ಮನೆ ಕಟ್ಟಿಸಿದ ಎನ್ನುವ ಆಡು ಮಾತು ಗಲ್ಫ್ ರಾಷ್ಟ್ರಗಳಲ್ಲಿ ಚಾಲ್ತಿಯಿದೆ. ಏನಪ್ಪ ಇದು, ಕುಬುಸ್ ತಿಂದರೆ ಹಣ ಉಳಿಯುತ್ತಾ ಅಂತ ಯೋಚಿಸ್ತೀರ? ಹೌದು!!! ಮಧ್ಯಪ್ರಾಚ್ಯಗಳಲ್ಲಿ ಕುಬೂಸ್ ಅಥವ ಕುಪೂಸ್ ಎಂದು ಕರೆಯುವ ಅರೇಬಿಕ್ ರೊಟ್ಟಿ ಲಕ್ಷಾಂತರ ಜನರಿಗೆ ಅತ್ಯಂತ ಕಡಿಮೆ ಖರ್ಚಿನಲ್ಲಿ ಹೊಟ್ಟೆ ತುಂಬಿಸುವ ಅನೇಕ ಅರಬ್ ಮತ್ತು ಏಷ್ಯನ್ ನಾಗರಿಕರ ನೆಚ್ಚಿನ  ಧೈನಂಧಿನ ಆಹಾರ. ಒಂದೆರೆಡು ಬಾಳೆಹಣ್ಣು ಅಥವ ಬೇಳೆ ಸಾರು ಅಥವ ತರಕಾರಿ ಪಲ್ಯ ಅಥವ ಇನ್ಯಾವುದೋ ಸಾರಿನ ಜತೆ ಮೂರ್ನಾಲ್ಕು ಕುಬೂಸ್ ತಿಂದರೆ ದಿನಪೂರ್ತಿ ದುಡಿಯಲು ಶಕ್ತಿ ಸಿಗುವುದು ನಿಶ್ಚಿತ.

 ಗಲ್ಫ್ ರಾಷ್ಟ್ರಗಳಲ್ಲಿ ಕೈತುಂಬಾ ದುಡಿಯಬಹುದು ಎನ್ನುವ ಕಾರಣಕ್ಕೆ ಬಹಳಷ್ಟು ಜನರು ಉದ್ಯೋಗಕ್ಕಾಗಿ ಕೊಲ್ಲಿ ರಾಷ್ಟ್ರಗಳಿಗೆ ವಲಸೆ ಬರುತ್ತಾರೆ. ಕೇವಲ ಭಾರತ ಮಾತ್ರವಲ್ಲದೆ, ಪಾಕಿಸ್ತಾನ, ಬಾಂಗ್ಲಾದೇಶ್, ಫಿಲಿಫಿನ್ಸ್, ಅಫ್ಘಾನಿಸ್ತಾನ್, ಆಫ್ರಿಕಾ ದೇಶಗಳು ಇತ್ಯಾದಿ ದೇಶಗಳ ಕಡೆಯಿಂದ ಬಂದು ಒಂದಲ್ಲ ಒಂದು ಉದ್ಯೋಗ ಮಾಡುತ್ತಾರೆ. ಇಲ್ಲಿಗೆ ಬರುವ ಒಬ್ಬೊಬ್ಬರದು ಒಂದೊಂದು ಉದ್ದೇಶ, ಊರಿನಲ್ಲಿ ತಮ್ಮ ಮನೆಯವರ ಹೊಟ್ಟೆ ತುಂಬಿಸಲು, ಮನೆಯಲ್ಲಿನ ಸಹೋದರಿಯರು/ ಮಕ್ಕಳ ಮದುವೆ,  ಮಕ್ಕಳಿಗೆ ಶಿಕ್ಷಣ ಕೊಡಿಸಲು ಮತ್ತು ಸ್ವಂತಕ್ಕೊಂದು ಸೂರು ಹೀಗೆ ವಿವಿಧ ಕಾರಣ ಹೊತ್ತು ಇಲ್ಲಿಗೆ ಲಗ್ಗೆ ಇಡುವುದು ಸಾಮಾನ್ಯ ಸಂಗತಿ. ಊರಿನಲ್ಲಿ ತಿಂಗಳಿಗೆ ಹತ್ತುಸಾವಿರ ದುಡಿಯಲು ಸಾಧ್ಯವಾಗದವರು, ಇಲ್ಲಿಗೆ ಬಂದು ಇಪ್ಪತ್ತು, ಮೂವತ್ತು ಸಾವಿರಕ್ಕೂ ಹೆಚ್ಚು ದುಡಿಯುತ್ತಾರೆ.

 

ಇಷ್ಟು ದೂರ ಬಂದು, ಇಲ್ಲಿ ದುಡಿದ ಮೇಲೆ ಅನಗತ್ಯ ಖರ್ಚುಮಾಡಿದರೆ ಬಂದ ಉದ್ದೇಶ ಸಾರ್ಥಕವಾಗುವುದಿಲ್ಲವೆಂದು  ಹೆಚ್ಚು ಹೆಚ್ಚು ಉಳಿತಾಯ ಮಾಡಲು ಯೋಚಿಸುತ್ತಾರೆ. ಹೀಗಾಗಿ ಅತ್ಯಂತ ಕಡಿಮೆ ಖರ್ಚಿನ ಊಟ, ಅತಿ ಕಡಿಮೆ ದರದಲ್ಲಿ ದೊರೆಯುವ ವಸತಿ ಸೌಲಭ್ಯ, ಸಾರಿಗೆ ಸೌಲಭ್ಯ ಇತ್ಯಾದಿ, ಹೀಗೆ ವಿವಿಧ ಮಾರ್ಗಗಳನ್ನು ಕಂಡು ಕೊಳ್ಳುವುದು ಸಹಜ. "ಅವನು ಕುಬೂಸ್ ತಿಂದು ದುಡ್ಡು ಉಳಿಸುತ್ತಾನೆ" ಎಂದು ಕೆಲವರು ತಮಾಷೆಗಾಗಿ ಹೇಳುತ್ತಾರೆ, ಅದು ನಿಜ. ಹೆಚ್ಚಿನ ಹಣ ಮತ್ತು ಅಡುಗೆ ತಯಾರಿಸುವ ಸಮಯ ಉಳಿಸಲು ಈ ಕುಬೂಸ್ ನೆರವಾಗುತ್ತದೆ. ಹೋಟೇಲ್ ಗಳಲ್ಲಿ ಒಂದು ಚಪಾತಿಯ ಬೆಲೆ ಹತ್ತು ರುಪಾಯಿಂದ ಇಪ್ಪತ್ತು ರೂಪಾಯಿವರೆಗೆ ಇದ್ದರೆ, ಅದೇ ಹತ್ತುರೂಪಾಯಿಗೆ ಮೂರ್ನಾಲ್ಕು ಕುಬೂಸ್ ಗಳು ಸಿಗುತ್ತವೆ. ಅದಕ್ಕೆ ಜತೆಯಾಗಿ ಮನೆಯಿಂದ ಏನಾದರು ತರಕಾರಿ ಪಲ್ಯತಂದರೆ ಸಾಕು. ಅತ್ಯಂತ ಕಡಿಮೆ ಖರ್ಚಿನಲ್ಲಿ ಹೊಟ್ಟೆ ತುಂಬಿಸಿಕೊಳ್ಳುವ ವಿಧಾನ ಇದು. ಒಂದೊತ್ತಿನ ಊಟಕ್ಕಾಗಿ ಸುಖಾ ಸುಮ್ಮನೆ ಜಾಸ್ತಿ ಹಣ ಏಕೆ ಖರ್ಚು ಮಾಡುವುದು ಎಂದು ಯೋಚಿಸುವ ಸಾವಿರಾರು ಬಡ ಕಾರ್ಮಿಕರು ಈ ಪದ್ದತಿಯನ್ನು ಅವಲಂಬಿಸಿದ್ದಾರೆ.

 

ತೆಳ್ಳನೆಯ ಮೃದುವಾದ ಲೆಬನೀಸ್ ಕುಬೂಸ್, ದಪ್ಪದಾದ ಬ್ರೆಡ್ ನಂತೆ ಇರುವ ಕುಬೂಸ್, ಗೋದಿಯಿಂದ ಮಾಡಿದ ತರಿತರಿಯಾಗಿರುವ ಕುಬೂಸ್ ಹೀಗೆ ವಿಧವಿಧದ ಕುಬೂಸ್ ಗಳು ಇಲ್ಲಿ ಲಭ್ಯವಿದೆ. ಚಪಾತಿ ಅಥವ ಪೂರಿಮಾಡುವ ರೀತಿಯಲ್ಲಿ  ಮೈದಾ ಅಥವ ಗೋಧಿ ಹಿಟ್ಟನ್ನು ಕಲೆಸಿ, ಚಪಾತಿಯಂತೆ ಉದ್ದಿ ಅದನ್ನು ಓವೆನ್ ನಲ್ಲಿ ಹದವಾಗಿ ಬೇಯಿಸುತ್ತಾರೆ. ಮಶಿನ್ ನಲ್ಲಿ ನಿಮಿಷಕ್ಕೆ ನೂರಾರು ಕುಬೂಸ್ ಗಳು ತಯಾರಾಗುತ್ತವೆ. ಇದಕ್ಕೆ ಬಳಸುವ ಪ್ರಿಸರ್ವೇಟೀವ್ಸ್ ನಿಂದ ಎರಡು ಮೂರು ದಿನಗಳವರೆಗೂ ಈ ಕುಬೂಸ್ ಗಳು ಹಾಳಾಗದೆ ಇರುತ್ತವೆ. ಮನೆಗೆ ಕೊಂಡೋಯ್ದ ಮೇಲೆ ಮತ್ತೊಮ್ಮೆ ಬಿಸಿ ಮಾಡುವ ಅಗತ್ಯವಿರುವುದಿಲ್ಲ. ನೇರವಾಗಿ ಯಾವುದಾದರು ಪಲ್ಯದ ಜತೆ ತಿನ್ನಬಹುದು. ಇವುಗಳನ್ನ ಪ್ಯಾಕೆಟ್ ಮಾಡಿ ಬೇಕರಿ, ಹೋಟೆಲ್, ರೆಸ್ಟಾರೆಂಟ್, ಕ್ಯಾಂಟೀನ್, ಮೆಸ್, ಸೂಪರ್ ಮಾರ್ಕೆಟ್, ಹೈಪರ್ ಮಾರ್ಕೆಟ್, ಹೀಗೆ ಎಲ್ಲಾ ಕಡೆ ಸರಬರಾಜು ಮಾಡುತ್ತಾರೆ. ಬಹಳಷ್ಟು ಕಡೆ ಚಪಾತಿ ಸಿಗದಿದ್ದರೂ, ಐದಾರು ಕುಬೂಸ್ ಗಳಿರುವ ಪ್ಯಾಕೆಟ್ ಎಲ್ಲಾ ಕಡೆಗಳಲ್ಲಿ ಲಭ್ಯವಿರುತ್ತದೆ. ಕುಬೂಸ್ ಪ್ಯಾಕೆಟ್ ಮೇಲೆ ತಯಾರಾದ ದಿನಾಂಕ ಮತ್ತು ಎಕ್ಸ್ಪೈರಿ ದಿನಾಂಕ ನಮೂದು ಮಾಡಿ ಮಾರಾಟ ಮಾಡುವುದು ಕಡ್ಡಾಯ.  ಎಕ್ಸ್ಪೈರಿ ದಿನಾಂಕದೊಳಗೆ ಬಿಕರಿಯಾಗದ ಪ್ಯಾಕೆಟ್ ಗಳನ್ನು ಮಾರುವಂತಿಲ್ಲ ಹೀಗಾಗಿ ಮಿಕ್ಕುಳಿದ ಪ್ಯಾಕೆಟ್ ಗಳನ್ನು ಎಲ್ಲೆಂದರಲ್ಲಿ ಬಿಸಾಡದೆ ಆಯಾ ಕಂಪನಿಗಳಿಗೆ ಮರಳಿಸುತ್ತಾರೆ.

 

ಇನ್ನು, ಅಫ್ಘನಿಸ್ತಾನಿಗಳು, ಪಾಕಿಸ್ತಾನಿಗಳು, ಇರಾನಿಗಳು ನಡೆಸುವ ಮ್ಯಾನುಯಲ್ ಬೇಕರಿಯಲ್ಲಿ ತಯಾರಿಸಲ್ಪಡುವ ತಂದೂರಿ ರೊಟ್ಟಿಗಳು ಸಹ ಇಲ್ಲಿ ಬಹಳ ಪ್ರಸಿದ್ದ. ಗಾತ್ರದಲ್ಲಿ ಚಪಾತಿಯ ಎರಡು ಅಥವ ಮೂರರಷ್ಟಿರುವ ಈ ರೊಟ್ಟಿಗಳು ಸಹ ಅತಿ ಕಡಿಮೆ ದರದಲ್ಲಿ ದೊರೆಯುತ್ತವೆ. ಈ ತಂದೂರಿ ರೊಟ್ಟಿಗಳು ಸಂಜೆಯ ವೇಳೆಯಲ್ಲಿ ಮಾತ್ರ ತಯಾರಿಸಲ್ಪಡುತ್ತವೆ. ಕೊಲ್ಲಿ ರಾಷ್ಟ್ರಗಳಲ್ಲಿ ಕುಬೂಸ್ ಪ್ರಸಿದ್ದವಾದರೆ, ಈಜಿಪ್ಟ್‌ ಮತ್ತು ಇರಾನಿನಲ್ಲಿ "ಪಾಕೆಟ್" ಪಿಟಾ ಬ್ರೆಡ್ ಮತ್ತು ಇರಾಕ್‌ನಲ್ಲಿ ಫ್ಲಾಟ್ ತನ್ನೂರ್ ಬ್ರೆಡ್ ಎಂದು ಕರೆಯಲ್ಪಡುತ್ತವೆ.

 ಕೆಲ ಕಾಫೀ ಶಾಪ್ ಗಳಲ್ಲಿ ಈ ಕುಬೂಸ್ ಅನ್ನು ಉಪಯೋಗಿಸಿ, ವೆಜಿಟೇಬಲ್, ಪಲಾಫಿಲ್, ಚಿಕನ್ ಶವರ್ಮ , ಮೊಟ್ಟೆ ಇತ್ಯಾದಿ ವಿಧದಲ್ಲಿ ಸ್ಯಾಂಡ್ ವಿಚ್ ತಯಾರಿಸಿಕೊಡುತ್ತಾರೆ.  ಕಡಿಮೆ ಬೆಲೆಯಲ್ಲಿ, ಅತಿ ಬೇಗನೇ ತಯಾರಿಸಿಕೊಡುವ ಈ ಸ್ಯಾಂಡ್ ವಿಚ್, ಬೆಳಿಗ್ಗೆ ಮನೆಯಲ್ಲಿ ತಿಂಡಿ ಮಾಡಿಕೊಳ್ಳಲು ಆಗದೆ ಇರುವವರಿಗೆ ಹಾಗೂ ಹೊರಡುವ ಗಡಿಬಿಡಿಯಲ್ಲಿರುವವರಿಗೆ ಒಂದು ವರದಾನ. ನಗರ ಪ್ರದೇಶದಿಂದ ದೂರವಿರುವ ಗುಡ್ಡಗಾಡು, ಮರುಭೂಮಿಗಳಲ್ಲಿ ವಾಸಿಸುವ ಬಡ ಬದ್ದುಗಳು(ಬೆದೋಯಿನ್ಸ್) ಸಹ ಈ ಕುಬೂಸ್ ಅನ್ನು ಇಷ್ಟ ಪಡುತ್ತಾರೆ. ಬಡವ ಬಲ್ಲಿದ ಎನ್ನದೆ ಎಲ್ಲರಿಗೂ ಪ್ರಿಯವಾದ ರೊಟ್ಟಿ ಈ ಕುಬೂಸ್. ಕೆಲ ಪಂಚತಾರ ಹೊಟೇಲ್ ಗಳ ಬಫೆಯಲ್ಲೂ ಈ ಕುಬೂಸ್ ದೊರಕುತ್ತದೆ.

 

ಬಹುತೇಕ ಅರಬ್ ರಾಷ್ಟ್ರಗಳಲ್ಲಿ 'ಕುಬೂಸ್' ಪ್ರಧಾನ ಆಹಾರವಾಗಿದೆ. ತಮ್ಮ ದೇಶದಲ್ಲಿ ಒಬ್ಬ ಬಡಪಾಯಿಯೂ ಹೊಟ್ಟೆ ಹಸಿವಿನಿಂದ ನರಳಬಾರದು ಎನ್ನುವ ಉದ್ದೇಶದಿಂದ ಇಲ್ಲಿನ ಸರ್ಕಾರಗಳು ಅತಿ ಕಡಿಮೆ ಬೆಲೆಯಲ್ಲಿ ಮಾರುಕಟ್ಟೆಯಲ್ಲಿ ದೊರೆಯುವಂತಹ ವ್ಯವಸ್ಥೆ ಮಾಡಿದ್ದಾರೆ. ಹತ್ತಾರು ವರ್ಷಗಳಿಂದ ಒಂದೇ ಬೆಲೆಯಿರುವುದು ಇಲ್ಲಿನ ವಿಶೇಷ. ಸರ್ಕಾರಗಳು ಬೆಲೆ ನಿಯಂತ್ರಣದ ಮಾಡುವುದಲ್ಲದೆ, ಬೆಲೆ ಏರಿಕೆ ಬಗ್ಗೆ ಮತ್ತು ತೂಕದ ಬಗ್ಗೆಯೂ ನಿಗಾವಹಿಸುತ್ತಾರೆ.  ಬಹುತೇಕ ಎಲ್ಲಾ ದೇಶಗಳಲ್ಲಿ, ಅಲ್ಲಿನ ಫ್ಲೋರ್ ಮಿಲ್ ಗಳು ಮತ್ತು ದೊಡ್ಡ ದೊಡ್ಡ ಬೇಕರಿಗಳು ಈ ಕುಬೂಸ್ ಅನ್ನು ತಯಾರಿಸುತ್ತವೆ. ಈ ಸಂಸ್ಥೆಗಳಿಗೆ ಲಕ್ಷಾಂತರ ರಿಯಾಲ್ ಗಳ ಸಬ್ಸಿಡಿ, ಅನುದಾನವನ್ನು ಸರಕಾರಗಳು ನೀಡುತ್ತವೆ ಮತ್ತು ಅತಿ ಕಡಿಮೆದರದಲ್ಲಿ ಗೋಧಿ ಹಿಟ್ಟನ್ನು ಪೂರೈಸಲಾಗುತ್ತದೆ. ಆಹಾರ ಭದ್ರತೆಯ ಒಂದು ಒಳ್ಳೆಯ ಉದ್ದೇಶದಿಂದ ಈ ವ್ಯವಸ್ಥೆ ಇಲ್ಲಿ ಜಾರಿಯಲ್ಲಿದೆ. ಇಂತಹ ವಿಧಾನವನ್ನು ಭಾರತದಲ್ಲೂ ಸಹ ಜಾರಿಗೆ ತಂದರೆ, ಬಡ ಕೂಲಿ ಕಾರ್ಮಿಕರು, ನಿರ್ಗತಿಕರು, ಅಸಹಾಯಕರಿಗೆ ಬಹಳಷ್ಟು ಅನುಕೂಲವಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ.

 

ಇಲ್ಲಿ ಕಷ್ಟಪಟ್ಟು ದುಡಿಯುವ ಒಬ್ಬ ಅನಿವಾಸಿ ಒಂದೆರೆಡು ವರ್ಷಕ್ಕೊಮ್ಮೆ ಊರಿಗೆ ಹೋದಾಗ, ಅವನ ಆಗಮನ ಮನೆಯವರಲ್ಲದೆ ಸ್ನೇಹಿತರಲ್ಲೂ ಬಹಳಷ್ಟು ನಿರೀಕ್ಷೆ ಇರುತ್ತದೆ.  ಸಾವಿರಾರು ರೂಪಾಯಿ ಹಣಗಳಿಸುತ್ತಾನೆ ಎಂದು ಯೋಚಿಸುತ್ತಾರೆ ವಿನಹ ಇಲ್ಲಿ ಹೇಗೆ ದುಡಿಯುತ್ತಾರೆ? ಎಷ್ಟು ಕಷ್ಟ ಪಡುತ್ತಾರೆ ಎನ್ನುವ ಮಾಹಿತಿಯಿರುವುದಿಲ್ಲ. ಬಂಧು ಬಳಗ, ಸ್ನೇಹಿತರು ಇಲ್ಲದ ದೂರದೂರಿಗೆ ಬಂದು ದುಡಿಮೆಯ ಪ್ರತಿ ರುಪಾಯಿ ಗಳಿಕೆಯ ಹಿಂದೆ ಒಂದೊಂದು ಕಥೆಯಿರುತ್ತದೆ. ಅತಿ ಕಡಿಮೆ ಸಂಭಳಕ್ಕೆ ಕೆಲಸ ಮಾಡುವ ಕಾರ್ಮಿಕರ ಕಥೆಗಳು ಮನಸ್ಸನ್ನು ಭಾರಗೊಳಿಸುತ್ತವೆ. ಕೆಲವು ಕಡೆ ಒಂದೇ ಕೋಣೆಯಲ್ಲಿ ಏಳೆಂಟು ಕಾರ್ಮಿಕರು ಹಂಚಿಕೊಂಡು ವಾಸಿಸುವುದು ಸಾಮಾನ್ಯ. ಕೆಲಸ ಮಾಡುವ ಕಂಪನಿ, ದೊಡ್ಡದಾಗಿದ್ದರೆ ಸೌಲಭ್ಯಗಳು ಪರವಾಯಿಲ್ಲ. ಚಿಕ್ಕ ಪುಟ್ಟ ಕಂಪನಿಗಳಾದರೆ, ಅಲ್ಲಿನ ವ್ಯವಸ್ಥೆಗಳು ಅಷ್ಟಕ್ಕಷ್ಟೆ.  ಮೂರು ಹೊತ್ತು ಒಳ್ಳೆಯ ಊಟ ತಿನ್ನದೆ ತನ್ನವರಿಗಾಗಿ ತಾಯ್ನಾಡನ್ನು ಬಿಟ್ಟು ದೂರದೂರದಲ್ಲಿ ದುಡಿಯುವ ಅನಿವಾಸಿಗಳ ಕರುಣಾಜನಕ ಕಥೆಗಳು ಬಹಳಷ್ಟಿವೆ, ಅವುಗಳ ಬಗ್ಗೆ ಬರೆದರೆ ಒಂದು ಕಾದಂಬರಿಯಾಗಬಹುದು. 

ಪಿ.ಎಸ್.ರಂಗನಾಥ

ಮಸ್ಕತ್-ಒಮಾನ್ ರಾಷ್ಟ್ರ

ಕಲ್ಲಣೆ ಹೋಗಿ ಕಲ್ಯಾಣಿ ಆಯ್ತು

ನೀರು ಇಲ್ಲದೆ ನಮ್ಮ ಬದುಕು ಇಲ್ಲ, ಮಾನವನ ನಾಗರೀಕತೆ ಬೆಳೆದಿದ್ದೇ ನೀರಿರುವ ಸ್ಥಳಗಳಲ್ಲಿ. ಮನುಷ್ಯನ ಬದುಕು ಅರಳಿದ್ದೇ ಈ ನೀರಿನ ಸೆಲೆಗಳಲ್ಲಿ ಎನ್ನುವುದು ಕಟು ಸತ್ಯ. ಶತ ಶತಮಾನಗಳ ಹಿಂದೆ ನಮ್ಮ ಪೂರ್ವಜರು  ನೀರಿನ ಸಂಗ್ರಹಣೆಗಾಗಿ ಕೆರೆಕಟ್ಟೆಗಳನ್ನು ನಿರ್ಮಿಸುತ್ತ ಬಂದರು. ಗ್ರಾಮೀಣ ಪ್ರದೇಶಗಳಲ್ಲಿ ಧೈನಂದಿನ ಬಳಕೆಗಾಗಿ ಅಂದು ನಿರ್ಮಿಸಿದ ನೀರಿನ ಹೊಂಡ ಅಥವ ಕೊಳಗಳು ಇಂದಿಗೂ ಮೂಲಸ್ವರೂಪದಲ್ಲಿ ಇರುವುದನ್ನು ನಾವು ಕಾಣುತಿದ್ದೇವೆ.  ಮಳೆ ನೀರು ಅಥವ ಭೂಮಿಯಿಂದ ಬಸಿಯುವ ನೀರು ಈ ಹೊಂಡಗಳಲ್ಲಿ ಸಂಗ್ರಹವಾಗುತಿತ್ತು. ಬಯಲು ಸೀಮೆಯಲ್ಲಿನ ಊರುಗಳಲ್ಲಿ ಅದರಲ್ಲೂ ನದಿ, ಹಳ್ಳ, ಕೆರೆಗಳು ಇರದೆ ಇರುವ ಊರಿನಲ್ಲಿನ ಈ ಕೊಳದ ನೀರು ಬಹಳಷ್ಟು ಉಪಯೋಗವಾಗುತಿತ್ತು. ಅಲ್ಲದೇ ಹಳ್ಳ, ಕೆರೆಗಳು ಊರಿನಿಂದ ದೂರವಿರುತಿದ್ದರಿಂದ, ಜನರ ಧೈನಂದಿನ ನೀರಿನ ಅಗತ್ಯತೆ ಕಂಡು ಅಂದಿನ ಆಡಳಿತಗಾರರು ಊರಿನೊಳಗೆ ಕೊಳಗಳನ್ನು ನಿರ್ಮಿಸುತಿದ್ದರು. ನೀರಿದ್ದರೆ, ಊರು ಕೇರಿ ಬೆಳೆಯಲು ಸಾಧ್ಯ. ಹಾಗಾಗಿ ಊರಿನ ಜನರಿಗೆ ಅನುಕೂಲವಾಗಲಿ ಎನ್ನುವ ದೃಷ್ಟಿಯಿಂದ ದೊಡ್ಡದಾದ ಹೊಂಡ ನಿರ್ಮಿಸಿ ಅದರ  ಸುತ್ತಲೂ ಇರುವ ಮಣ್ಣಿನ ಗೋಡೆಯು ಕುಸಿದು ಹೋಗಬಾರದು ಎಂದು ಕಲ್ಲುಗಳನ್ನು ಜೋಡಿಸಿ ಹಾಗೂ ಮೆಟ್ಟಿಲುಗಳನ್ನಿಟ್ಟು ನೋಡಲು ಸುಂದರವಾಗಿ ಆಕರ್ಷಕವಾಗಿರುವಂತೆ ಕಟ್ಟುತಿದ್ದರು. ಈ ನೀರಿನ ಕೊಳಗಳನ್ನು "ಕಲ್ಯಾಣಿ" ಎಂದು ಜನರು ಕರೆಯುತಿದ್ದರು. ರಾಜ್ಯದ ಹಲೆವೆಡೆ ಸುಂದರವಾದ ಕಲ್ಯಾಣಿಗಳನ್ನು ಇಂದೂ ಸಹ ಕಾಣಬಹುದು. ಜನರು ಈ ಮೆಟ್ಟಿಲುಗಳ ಮುಖಾಂತರ ಕಲ್ಯಾಣಿಯೊಳಗೆ ಇಳಿದು ನೀರು ತುಂಬಿಕೊಂಡು ಹೋಗುವುದು ಸರ್ವೇ ಸಾಮಾನ್ಯವಾಗಿತ್ತು. ಬೇಸಿಗೆ ಕಾಲದಲ್ಲಿ ಈ ಕಲ್ಯಾಣಿಗಳು ಜನರಿಗೆ ಬಹಳಷ್ಟು ಉಪಯುಕ್ತವಾಗಿದ್ದವು. ಕೆಲವು ದೇವಸ್ಥಾನಗಳಲ್ಲಿ ಈ ಕಲ್ಯಾಣಿಗಳನ್ನು ನಾವು ಇಂದಿಗೂ ಕಾಣುತ್ತೇವೆ. ಕೆಲೆವೆಡೆ ಪುಷ್ಕರಣಿ, ತೀರ್ಥ ಎನ್ನುವ ಹೆಸರಿನಲ್ಲಿ ಕರೆಯುತ್ತಾರೆ.

 ಈ ನೀರಿನ ಕೊಳಕ್ಕೆ ಕಲ್ಯಾಣಿ ಎನ್ನುವ ಹೆಸರು ಹೇಗೆ ಸೂಕ್ತ ಎಂದು ಯೋಚಿಸುತ್ತಿರುವಾಗ, ಕಲ್ಯಾಣಿ ಶಬ್ದವು "ಕಲ್ಲು" ಮತ್ತು "ಅಣೆ" ಎರಡು ಪದಗಳಿಂದ ಯಾಕೆ ರೂಪುಗೊಂಡಿರಬಾರದು ಎನ್ನು ಆಲೋಚನೆ ಬಂತು. ಯಾಕೆಂದರೆ "ಅಣೆ" ಶಬ್ದದ ಅರ್ಥ ಒಡ್ಡು ಅಥವ ಅಡ್ಡಗಟ್ಟುವುದು. ಅಣೆಕಟ್ಟು ಅಂದರೆ ನೀರಿನ ಹರಿವಿಗೆ ಅಡ್ಡಲಾಗಿ ಹಾಕಿದ ಕಟ್ಟೆ. ಆದ್ದರಿಂದ ಕಲ್ಲುಗಳನ್ನು ಹಾಕಿ ಒಡ್ಡು ಕಟ್ಟಿರುವುದರಿಂದ  ಕಲ್ಲ್+ಅಣೆ= ಕಲ್ಲಣೆಯಾಗಿರಬಹುದು ಎಂದು ಅನಿಸಿತು. ಕಾಲಾನಂತರದಲ್ಲಿ ಜನರ ಆಡುಮಾತಿನಲ್ಲಿ ಕಲ್ಯಾಣಿಯಾಗಿ ಬದಲಾವಣೆಯಾಗಿರುವ ಸಾಧ್ಯತೆಯೂ ಬಲವಾಗಿ ಕಂಡುಬಂತು.

 

ಉತ್ತರ ಮತ್ತು ಮಧ್ಯ ಕರ್ನಾಟಕದ ಗ್ರಾಮೀಣ ಜನತೆ ಹಳ್ಳಿಗಳಲ್ಲಿ ಬಹಳಷ್ಟು ಶಬ್ದಗಳನ್ನು ಮೂಲ ಉಚ್ಚಾರಣೆಯಿಂದ ಭಿನ್ನವಾಗಿ ಬಳಕೆ ಮಾಡುತ್ತಿರುವುದನ್ನು ಗಮನಿಸಬಹುದು. ಉದಾಹರಣೆಗೆ ಬೇಸಾಯ - ಬ್ಯಾಸಾಯ, ಬೇಡ - ಬ್ಯಾಡ, ಬೇಸರ - ಬ್ಯಾಸರ ಎಂದು ಉಪಯೋಗಿಸುತ್ತಾರೆ. ಇಂತಹ ಹಲವಾರು ಶಬ್ದಗಳನ್ನು ನಾವು ಉದಾಹರಿಸಬಹುದು. ಪ್ರತಿ ನೂರಾರು ಕಿ.ಮಿ.ಗೆ ಮಾತನಾಡುವ ಭಾಷೆಯ ಶೈಲಿ, ಆಹಾರ ಪದ್ದತಿ ಹೇಗೆ ಬದಲಾಗುತ್ತವೋ ಹಾಗೆಯೇ ಕೆಲವು ಶಬ್ದಗಳು ಸಹ ಬದಲಾಗುವುದು ಸಾಮಾನ್ಯ. ಇನ್ನು ಹೊರಗಿನವರ ಪ್ರಭಾವ ದಿಂದಲೂ ಸಹ ಕ್ರಮೇಣ ಬದಲಾಗುವುದನ್ನ ಕಂಡಿದ್ದೇವೆ. ಬೆಂಗಳೂರನ್ನು ಆಂಗ್ಲರು ತಮ್ಮ ಉಚ್ಚಾರಣೆಯಲ್ಲಿ ಬ್ಯಾಂಗಲೋರ್ ಎಂದು ಬದಲಾಯಿಸಿದ್ದಲ್ಲದೆ, ಹೊರರಾಜ್ಯದವರು ಸಹ ಇಂದಿಗೂ ಬ್ಯಾಂಗಲೋರ್ ಎಂದು ಕರೆಯುವುದನ್ನ ಕಾಣುತಿದ್ದೇವೆ. ಅದೇ ರಿತಿ ಬಹಳಷ್ಟು ಜನರು ಚಿಕ್ಕಮಗಳೂರನ್ನು, ಚಿಕ್ಕಮಂಗಳೂರು ಎಂದೇ ಕರೆಯುತ್ತಾರೆ. ಮಂಗಳೂರಿನಲ್ಲಿ ಹಂಪನಕಟ್ಟೆ ಎನ್ನುವ ಪ್ರದೇಶವಿದೆ. ಶತಮಾನದ ಹಿಂದೆ ಇದಕ್ಕೆ ಅಪ್ಪಣ್ಣ ಕಟ್ಟೆ ಎನ್ನುವ ಹೆಸರಿತ್ತಂತೆ. ಅಲ್ಲಿನ ಸ್ಥಳೀಯರಾದ ಅಪ್ಪಣ್ಣ ಎನ್ನುವವರು ಅಲ್ಲಿನ ಅಶ್ವತ್ಥ ಮರದ ಕಟ್ಟೆಯ ಮೇಲೆ ಕುಳಿತು ನಗರಕ್ಕೆ ಬಂದ ಜನರಿಗೆ ನೀರನ್ನು ಕೊಡುತಿದ್ದರಂತೆ. ಹಾಗಾಗಿ ಆ ಕಟ್ಟೆಗೆ ಅಪ್ಪಣ್ಣ ಕಟ್ಟೆ ಎನ್ನುವ ಹೆಸರು ಇತ್ತು, ಆದರೆ ವರ್ಷಗಳು ಉರುಳಿದಂತೆ, ತಲೆಮಾರುಗಳು ಬದಲಾದಂತೆ ಅಪ್ಪಣ್ಣಕಟ್ಟೆಯಾಗಿದ್ದ ಪ್ರದೇಶ ಹಂಪನಕಟ್ಟೆ ಎಂದು ಬದಲಾಗಿದೆ. ಕರುನಾಡು, ಕರ್ಣಾಟ, ಕರ್ನಾಟಕ ಆಗಿ ಬದಲಾಗಿರುವುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಹೀಗಾಗಿ, ಶತಶತಮಾನಗಳ ಹಿಂದಿದ್ದ ಕೆಲ ಶಬ್ದಗಳು ಜನರು ಬಳಸುತ್ತ ಇಂದು ಅದರ ಮೂಲ ಸ್ವರೂಪದಲ್ಲಿ ಬದಲಾವಣೆಯಾಗಿರುವ ಸಾಧ್ಯತೆ ಇದೆ.

 

ಜನರಿಗೆ ಧೈನಂದಿನ ಉಪಯೋಗಕ್ಕೆ ಅನುಕೂಲಕರವಾಗಲಿ ಎನ್ನುವ ಉದ್ದೇಶದಿಂದ ಅಂದಿನ ರಾಜಮಹಾರಾಜರು, ಪಾಳೇಗಾರರು ಈ ಕಲ್ಯಾಣಿಗಳನ್ನು ಕಟ್ಟಿಸುತಿದ್ದರು, ಒಂದರ್ಥದಲ್ಲಿ ಜನಕಲ್ಯಾಣಕ್ಕೆ ಉಪಯೋಗವಾಗಿದ್ದರಿಂದ ಕಲ್ಯಾಣಿ ಎಂದು ಹೆಸರಿಟ್ಟಿರುವ ಸಾಧ್ಯತೆಯನ್ನು ಸಹ ಅಲ್ಲಗಳೆಯಲಾಗದು. ಗಿರಿಜೆ, ಪಾರ್ವತಿ, ಜಗನ್ಮಾತೆಯ ಇನ್ನೊಂದು ಹೆಸರೇ ಕಲ್ಯಾಣಿ, ಸಾಮಾನ್ಯವಾಗಿ ನದಿಗಳಿಗೆ ಹೆಣ್ಣಿನ ಹೆಸರನ್ನು ಇಡುತ್ತಾರೆ, ಆದರೆ ನದಿಗೆ ಮತ್ತು ಕೆರೆಗೆ ಹೋಲಿಸಿದರೆ ಚಿಕ್ಕದಾದ ನೀರಿನ ಕೊಳಕ್ಕೆ ದೇವಿಯ ಹೆಸರನ್ನು ಇಟ್ಟಿರುವ ಸಾಧ್ಯತೆಯಿಲ್ಲ. ಹೀಗಾಗಿ ಜನರ ಆಡುಮಾತಿನಿಂದ ಕಲ್ಲಣೆ ಕಲ್ಯಾಣಿಯಾಗಿದೆ ಎಂದು ಹೇಳಬಹುದು.

 ಬರಹ:- ಪಿ.ಎಸ್.ರಂಗನಾಥ, ಮಸ್ಕತ್

 

#Oman #Kannada #Karnataka #kannadiga #Dubai #gulf #Dolphin #Muscat #bengaluru

*ಕೊಲ್ಲಿ ರಾಷ್ಟ್ರಗಳಲ್ಲಿ ಮೇ ತಿಂಗಳಿನಿಂದ ಸೆಪ್ಟೆಂಬರ್ ವರೆಗೂ ಬೇಸಿಗೆ!!!*

ಕೊಲ್ಲಿ ರಾಷ್ಟ್ರಗಳಲ್ಲಿ ಈಗ ಬೇಸಿಗೆಯ ಸಮಯ. ಮೇ ತಿಂಗಳ ಮೊದಲ ವಾರದಿಂದ ಏರಿಕೆಯಾದ ತಾಪಮಾನ ಸೆಪ್ಟೆಂಬರ್ ವರೆಗೂ ಇಳಿಯುವುದೇ ಇಲ್ಲ. ಜಾಗತಿಕ ಹವಮಾನ ಬದಲಾವಣೆಯಿಂದ ಆಗುತ್ತಿರುವ ಪರಿಣಾಮವೋ ಗೊತ್ತಿಲ್ಲ, ಈ ಬಾರಿ ಮಾತ್ರ ಭಯಂಕರ ಬಿಸಿಲು.  ಮನೆಯಲ್ಲಿರುವ ಏಸಿಗಳು ಸರಿಯಾಗಿ ಕೆಲಸ ಮಾಡ್ತಿಲ್ಲ ಅನ್ನುವಷ್ಟರ ಮಟ್ಟಿಗೆ ಇಲ್ಲಿ ಬಿಸಿಲಿನ ಝಳವಿದೆ.

ಈ ಬಿಸಿಲಿನಿಂದ ಪಾರಾಗಲು ಏಸಿಯ ಮೊರೆ ಹೋಗಲೇ ಬೇಕು, ಹೀಗಾಗಿ ಪ್ರತಿಯೊಬ್ಬರ ಮನೆಯಲ್ಲೂ ನಾಲ್ಕೈದು ಏಸಿಗಳು ಇರುತ್ತವೆ. ಕಾರ್, ಬಸ್, ಅಂಗಡಿ, ಮಾಲ್ ಗಳು, ರೆಸ್ಟೋರೆಂಟ್ ಗಳು ಎಲ್ಲಿಯೇ ಹೋದರು ಏಸಿ ಖಂಡಿತ ಇರುತ್ತದೆ. ಬೇಸಿಗೆಯಲ್ಲಿ ಏಸಿ ಇಲ್ಲದೆ ಇಲ್ಲಿ ಕೆಲಸಮಾಡಲು ಸಾಧ್ಯವೇ ಇಲ್ಲ. ಆರೇಳು ತಿಂಗಳುಗಳ ಕಾಲ ಏಸಿಯಿಂದ  ಬರುವ ತಂಪಾದ ಗಾಳಿಯೊಂದಿಗೆ ಜೀವನ ನಡೆಸಲೇ ಬೇಕು.

ಭಾರತದಲ್ಲಿ ಬಹಳಷ್ಟು ಜನರಿಗೆ ಕೊಲ್ಲಿ ರಾಷ್ಟ್ರಗಳಲ್ಲಿ ಎಷ್ಟು ಬಿಸಿಲು ಇರುತ್ತೆ? ಅದು ಎಷ್ಟು ತಿಂಗಳುಗಳವರೆಗೂ ಇರುತ್ತೆ, ಬೇಸಿಗೆಕಾಲ, ಮಳೆಗಾಲ, ಚಳಿಗಾಲ ಯಾವಾಗ ಪ್ರಾರಂಭ ಎಂದು ಗೊತ್ತಿರುವುದಿಲ್ಲ. ಇಲ್ಲಿರುವುದು ಎರಡೇ ಕಾಲ ಎಂದರೆ ನಂಬ್ತೀರಾ? ಖಂಡಿತಾ ಇಲ್ಲ.

ಅದು ಹೇಗೆ ಸಾಧ್ಯ, ಆಂಗ್ಲರ ಪದ್ಧತಿಯ ಪ್ರಕಾರ ನಾಲ್ಕು ಕಾಲಗಳು ಇರಬೇಕಲ್ಲವೇ? ಎಂದು ನಮ್ಮ ಮೆದುಳು ನಾಲ್ಕು ಕಾಲಗಳ ಬಗ್ಗೆ ಯೋಚಿಸಲಾರಂಬಿಸುತ್ತದೆ. 1) ಸ್ಪ್ರಿಂಗ್ (spring) ಅಥವಾ ವಸಂತ, 2) ಸಮ್ಮರ್ (summer) ಅಥವಾ ಬೇಸಿಗೆ ಕಾಲ, 3) ಆಟಂ (autumn) ಅಥವಾ ಶರದೃತು ಹಾಗೂ 4) ವಿಂಟರ್ (winter) ಅಥವಾ ಚಳಿಗಾಲ. ವಾಸ್ತವವಾಗಿ, ಈ ಗಲ್ಫ್ ರಾಷ್ಟ್ರಗಳಲ್ಲಿ ಇರುವುದು ಒಂದು ಬೇಸಿಗೆ ಕಾಲ ಮತ್ತೊಂದು ಚಳಿಗಾಲ. ಇಲ್ಲಿ ಮಳೆಗಾಲ ಇಲ್ಲವೇ ಇಲ್ಲ.

 

ನಮ್ಮ ಭಾರತ ದೇಶದಲ್ಲಿ ಬೇಸಿಗೆ ಕಾಲ ಮುಗಿದ ನಂತರ ಮುಂಗಾರು ಶುರುವಾಗುತ್ತದೆ ಮುಂಗಾರು ಮುಗಿದ ನಂತರ ಚಳಿಗಾಲ ನಂತರ ಬೇಸಿಗೆ ಕಾಲ. ಆದರೆ ಮಧ್ಯಪ್ರಾಚ್ಯ ರಾಷ್ಟ್ರಗಳಲ್ಲಿ ಚಳಿಗಾಲದ ನಂತರ ಬೇಸಿಗೆ ಪ್ರಾರಂಭವಾದರೆ, ಅದು ಕೊನೆಗೊಳ್ಳುವುದು ಮತ್ತೊಮ್ಮೆ ಚಳಿಗಾಲ ಪ್ರಾರಂಭವಾಗುವವರೆಗೆ. ಅಂದರೆ ಇಲ್ಲಿ ಮುಂಗಾರು ಇಲ್ಲವೇ ಇಲ್ಲ. ಏಪ್ರಿಲ್ ನಿಂದ ಬೇಸಿಗೆ ಕಾಲ ಶುರುವಾಗಿ ಸೆಪ್ಟೆಂಬರ್ ಅಂತ್ಯದವರೆಗೂ ಬೇಸಿಗೆ ಇರುತ್ತದೆ. ಮೇ ತಿಂಗಳಿನಿಂದ ಸೆಪ್ಟೆಂಬರ್ ರವರೆಗೂ ಭಯಂಕರ ಸುಡು ಬಿಸಿಲು, ದುಬೈ, ಅಬುಧಾಬಿ, ಒಮಾನ್, ಕುವೈತ್, ಇರಾಕ್, ಬಹರೈನ್, ಸೌದಿ ಅರೇಬಿಯಾ, ಯೆಮನ್ ಕತಾರ್ ಮತ್ತಿತರ ರಾಷ್ಟ್ರಗಳಲ್ಲಿ ತಾಪಮಾನ ಒಮ್ಮೊಮ್ಮೆ 50ಡಿಗ್ರಿ  ದಾಟುತ್ತದೆ.

 

ನಮ್ಮ ಕಡೆ ಜೂನ್ ತಿಂಗಳು ಬಂತೆಂದರೆ, ಮಳೆಗಾಲ ಪ್ರಾರಂಭವಾಗುತ್ತದೆ.  ಮಳೆಗಾಲದಲ್ಲಿ ಬಯಲುಸೀಮೆಯಲ್ಲಿ ಒಮ್ಮೊಮ್ಮೆ ಮಳೆ ಬರುವುದು ತಡವಾದರೂ, ವಾತಾವರಣ ತಂಪಾಗಿರುತ್ತದೆ. ಬೇಸಿಗೆಯಲ್ಲಿದ್ದಷ್ಟು ಬಿಸಿಲಿನ ತಾಪಮಾನ ಇರುವುದಿಲ್ಲ. ಆದರೆ ಗಲ್ಫ್ ರಾಷ್ಟ್ರಗಳಲ್ಲಿ ಇದೇ ಸಮಯದಲ್ಲಿ ಭಯಾನಕ ಬಿಸಿಲು. ಸರಿ ಸುಮಾರು ಆರು ತಿಂಗಳುಗಳ ಕಾಲ ಬೇಸಿಗೆಯ ವಾತಾವರಣ ಮತ್ತು ಡಿಸೆಂಬರ್ ಮತ್ತು ಜನವರಿಯಲ್ಲಿ ಚಳಿಗಾಲವಿರುತ್ತದೆ. ಇನ್ನು ಅಕ್ಟೋಬರ್, ನವೆಂಬರ್, ಫೆಬ್ರವರಿ ಮತ್ತು ಮಾರ್ಚ್ ನಲ್ಲಿ ಅಂತ ಚಳಿಯೂ ಇಲ್ಲ ಮತ್ತು ಹೆಚ್ಚಿನ ಬಿಸಿಲು ಸಹ ಇರುವುದಿಲ್ಲ. ಆದರೆ ಸೌದಿ ಅರೇಬೀಯಾದ ಕೆಲ ಪ್ರದೇಶ, ಮತ್ತು ಇರಾಕ್ ಕುವೈತ್ ನಂತಹ  ದೇಶಗಳಲ್ಲಿ ಡಿಸೆಂಬರ್ ಮತ್ತು ಜನವರಿಯಲ್ಲಿ ಮಡುಗಟ್ಟುವ ಚಳಿಯಿರುತ್ತದೆ. ಈ ಚಳಿಗೆ ಹೋಲಿಸಿದರೆ ಯುಏಇ, ಒಮಾನ್ ಮತ್ತು ಯೆಮನ್ ಮತ್ತಿತರ ದೇಶಗಳಲ್ಲಿ ಅಂತಹ ಚಳಿಯಿರುವುದಿಲ್ಲ.

 ನಮ್ಮ ದೇಶದಲ್ಲಿನ ಕೆಲರಾಜ್ಯಗಳಲ್ಲಿ ಕೆಲವೊಮ್ಮೆ ಮುಂಗಾರಿನಲ್ಲಿ ನಿರೀಕ್ಷಿಸಿದಷ್ಟು ಮಳೆ ಬರದೆ ಇದ್ದಾಗ ಬರಗಾಲ ಘೋಷಿಸುವ ಪದ್ದತಿಯಿದೆ.  ಈ ಗಲ್ಫ್ ರಾಷ್ಟ್ರಗಳಲ್ಲಿ ಅಪರೂಪಕ್ಕೆ ಒಮ್ಮೆ ಮಳೆ ಬರುತ್ತದೆ, ಹಾಗಂತ ಬರಗಾಲ ಅಥವ ಬರ ಪೀಡಿತ ಪ್ರದೇಶ ಎಂದು ಇಲ್ಲಿ ಘೋಷಿಸುವುದಿಲ್ಲ.  ಮಳೆಯಿಂದ ಬೆಳೆ ಬೆಳೆಯುವ ಪದ್ದತಿ ಇಲ್ಲ. ಜನಕ್ಕೆ ಬೇಕಾದ ಆಹಾರ ಪದಾರ್ಥಗಳನ್ನು ಭಾರತ ಸೇರಿದಂತೆ ಇತರೆ ಹೊರ ರಾಷ್ಟ್ರಗಳಿಂದ ಆಮದು ಮಾಡಿಕೊಳ್ಳಲಾಗುತ್ತದೆ. ಈ ಆಮದು ಮಾಡಿಕೊಳ್ಳುವುದು ಇಂದು ನಿನ್ನೆಯಿಂದಲ್ಲ, ಪುರಾತನ ಕಾಲದಿಂದಲೂ ನಡೆದುಕೊಂಡು ಬಂದಿದೆ.  ಈಗ ಕಾಲ ಬದಲಾಗಿದೆ, ಗಲ್ಫ್ ರಾಷ್ಟ್ರಗಳಲ್ಲಿ ಸಿಗುವ ತೈಲವನ್ನು ಮಾರಿ ಬಂದ ಹಣದಿಂದ ಈ ದೇಶಗಳಿಗೆ ಬೇಕಾದ ಅಗತ್ಯ ವಸ್ತುಗಳನ್ನು ಇತರೆ ರಾಷ್ಟ್ರಗಳಿಂದ ಖರೀದಿಸುತ್ತಾರೆ. ವಿಶ್ವದ ಶ್ರೀಮಂತ ಮತ್ತು ಅಭಿವೃದ್ದಿ ಹೊಂದಿದ ರಾಷ್ಟ್ರಗಳ ಸಾಲಿನಲ್ಲಿ ಈ ಅರಬ್ ರಾಷ್ಟ್ರಗಳು ಇವೆ.

 ಮಧ್ಯಪ್ರಾಚ್ಯ ರಾಷ್ಟ್ರಗಳು ಬಹುತೇಕ ಮರುಭೂಮಿ ಪ್ರದೇಶವನ್ನು ಹೊಂದಿವೆ. ಸಾಮಾನ್ಯವಾಗಿ ಮರುಭೂಮಿಗಳಲ್ಲಿ ಬಹಳ ಕಡಿಮೆ ಮಳೆ ಬೀಳುತ್ತದೆ. ಇಲ್ಲಿ ಅರಣ್ಯ ಪ್ರದೇಶ ಬಹಳ ಕಡಿಮೆ. ಹಾಗೂ ಈ ಕೊಲ್ಲಿ ಪ್ರದೇಶ ಟ್ರಾಪಿಕ್ ಆಫ್ ಕ್ಯಾನ್ಸರ್ ಅಕ್ಷಾಂಶ ದಲ್ಲಿದೆ, ಇದು ಹೆಚ್ಚಿನ ಒತ್ತಡದ ವಲಯವಾಗಿರುವುದರಿಂದ ಸ್ವಾಭಾವಿಕವಾಗಿ ಮೋಡಗಳ ಕೊರತೆ ಇರುತ್ತದೆ, ಅತಿ ಕಡಿಮೆ ಮೋಡಗಳು ಇರುವುದರಿಂದ ಸೂರ್ಯನ ಶಾಖ ನೇರವಾಗಿ ಇಲ್ಲಿನ ಭೂಭಾಗದಲ್ಲಿ ಬೀಳುತ್ತದೆ, ಆದ್ದರಿಂದ ಬೇಸಿಗೆಯಲ್ಲಿ ಈ ಸ್ಥಳ ಅತ್ಯಂತ ಬಿಸಿ ಯಾಗಿರುತ್ತದೆ ಎನ್ನುವ ವಾದವಿದೆ. ವಾತಾವರಣದಲ್ಲಿ ಹೆಚ್ಚಿನ ಮಟ್ಟದ ಆರ್ದ್ರತೆಯೂ ಇರುವುದರಿಂದ, ಜನರಿಗೆ ಅತಿಯಾದ ಸೆಖೆಯ ಅನುಭವಾಗುತ್ತದೆ. ಆರ್ದ್ರತೆಯ ಕಾರಣದಿಂದ ಮೈಯಿಂದ  ತುಂಬ ಜಾಸ್ತಿ ಬೆವರು ಹೊರಬರುತ್ತದೆ. ಮಧ್ಯಪ್ರಾಚ್ಯದ ಹೆಚ್ಚಿನ ಭಾಗವು ಮತ್ತು ಮೆಡಿಟರೇನಿಯನ್‌ನ ಪ್ರದೇಶವು ವಿಶಿಷ್ಟವಾದ ಶುಷ್ಕ ಬೇಸಿಗೆಯ ಹವಾಮಾನವನ್ನು ಹೊಂದಿದೆ. ಇದೇ ರೀತಿಯ ಹವಾಮಾನ ಪಶ್ಚಿಮ ಆಸ್ಟ್ರೇಲಿಯಾ, ದಕ್ಷಿಣ ಅಮೆರಿಕಾ ಮತ್ತು ದಕ್ಷಿಣ ಆಫ್ರಿಕಾದ ಪಶ್ಚಿಮ ಭಾಗಗಳೊಂದಿಗೆ ಮತ್ತು ವಿಶೇಷವಾಗಿ ಯುನೈಟೆಡ್ ಸ್ಟೇಟ್ಸ್‌ನ ಪಶ್ಚಿಮ ಕರಾವಳಿಗಳಲ್ಲಿ ಕಾಣಬಹುದು.

ಪಿ.ಎಸ್.ರಂಗನಾಥ

ಮಸ್ಕತ್, ಒಮಾನ್ ರಾಷ್ಟ್ರ

#Oman #Kannada #Karnataka #kannadiga #Dubai #gulf #Dolphin #Muscat #bengaluru

ಪ್ರವಾಸಿಗರಿಗೆ ಥ್ರಿಲ್ ನೀಡುವ ಒಮಾನಿನ ಡಾಲ್ಫಿನ್ ಗಳು

ಒಮಾನಿನ ಕಡಲ ತೀರ ಸಾಕಷ್ಟು ಆಕರ್ಷಕ ಸಮುದ್ರ ಜೀವಿಗಳಿಗೆ ನೆಲೆಯಾಗಿದೆ, ಇಲ್ಲಿನ ಅರಬ್ಬಿ ಸಮುದ್ರದಲ್ಲಿ ವೈವಿಧ್ಯಮಯ ಜೀವರಾಶಿಗಳಾದ, ತಿಮಿಂಗಿಲಗಳು, ಡಾಲ್ಫಿನ್‌ಗಳು, ಆಮೆಗಳು, ಎಲ್ಲಾ ರೀತಿಯ ಮೀನುಗಳು ಮತ್ತು ಉಷ್ಣವಲಯದ ಮೀನುಗಳು ಹೇರಳವಾಗಿವೆ. ಆಮೆಗಳು ಮತ್ತು ಡಾಲ್ಫಿನ್‌ಗಳು ನೋಡುವುದಕ್ಕಾಗಿಯೇ ಪ್ರತಿವರ್ಷ ಲಕ್ಷಾಂತರ ಪ್ರವಾಸಿಗರು ಆಗಮಿಸುವುದು ಇಲ್ಲಿನ ವಿಶೇಷ.  ಒಮಾನಿನಲ್ಲಿ ಡಾಲ್ಫಿನ್ ವೀಕ್ಷಣೆ ಮತ್ತು ಆಮೆಗಳ ವೀಕ್ಷಣೆ ಜನಪ್ರಿಯ ಚಟುವಟಿಕೆಯಾಗಿವೆ. ಒಮಾನ್ ರಾಷ್ಟ್ರವು ಸುಂದರವಾದ ಮರುಭೂಮಿ ಭೂಪ್ರದೇಶದ ಹೊಂದಿರುವುದರ ಜತೆಗೆ ಸುಂದರವಾದ ಕಡಲತೀರಗಳನ್ನು ಹೊಂದಿದ್ದು ಕೆಲವೆಡೆ ಸ್ಫಟಿಕದಷ್ಟೆ ಸ್ಪಷ್ಟವಾಗಿ ಕಾಣುವ ನೀರನ್ನು ಹೊಂದಿರುವ ಈ ಸುಂದರ ಕಡಲ ತೀರಗಳು ದೇಶಿಯ ಮತ್ತು ವಿದೇಶಿ ಪ್ರವಾಸಿಗರನ್ನು ಬಹಳಷ್ಟು ಆಕರ್ಷಿಸುತ್ತವೆ. ಸುಮಾರು 3165 ಕಿ.ಮಿ (1967 ಮೈಲು) ಉದ್ದದ ಕರಾವಳಿ ಪ್ರದೇಶವನ್ನು ಒಮಾನ್ ರಾಷ್ಟ್ರ ಹೊಂದಿದೆ. ಈ ಸಮುದ್ರದಲ್ಲಿ ಅಳಿವಿನಂಚಿನಲ್ಲಿರುವ  ಹಂಪ್‌ಬ್ಯಾಕ್ ತಿಮಿಂಗಿಲಗಳ ಜತೆಗೆ ಪಿಗ್ಮಿ ಬ್ಲೂ ವೇಲ್‌ಗಳು, ಬ್ರೈಡ್‌ನ ತಿಮಿಂಗಿಲಗಳು, ಸ್ಪರ್ಮ್ ತಿಮಿಂಗಿಲಗಳು, ಕಿಲ್ಲರ್ ವೇಲ್ಸ್ , ರಿಸ್ಸೋಸ್ ಡಾಲ್ಫಿನ್‌ಗಳು, ಸ್ಪಿನ್ನರ್ ಡಾಲ್ಫಿನ್‌ಗಳು, ಬಾಟಲ್‌ನೋಸ್ ಡಾಲ್ಫಿನ್‌ಗಳು, ಇಂಡೋ-ಪೆಸಿಫಿಕ್ ಹಂಪ್‌ಬ್ಯಾಕ್ಡ್ ಡಾಲ್ಫಿನ್‌ಗಳು ಇವೆ.

 

ಒಮಾನ್ ರಾಷ್ಟ್ರಕ್ಕೆ ಪ್ರವಾಸ ಬಂದವರು ಭೇಟಿ ನೀಡುವ ಪ್ರವಾಸಿ ತಾಣಗಳ ಪಟ್ಟಿಯಲ್ಲಿ ಇಲ್ಲಿನ ಪ್ರಸಿದ್ದ "ಡಾಲ್ಫಿನ್ ವಾಚಿಂಗ್"  ಖಂಡಿತಾ ಇರುತ್ತದೆ. ಪ್ರವಾಸಿಗಳು ಅಷ್ಟೇ ಅಲ್ಲದೆ, ವಲಸೆ ಉದ್ಯೋಗಿಗಳ ಬಂಧು ಬಳಗ ಮತ್ತಿತರ ಅಥಿತಿಗಳು ತಪ್ಪದೇ ಇಲ್ಲಿಗೆ ಭೇಟಿ ನೀಡುವುದು ಇಲ್ಲಿನ ವಿಶೇಷ. ಅತ್ಯಂತ ಬುದ್ಧಿವಂತ ಪ್ರಾಣಿಗಳಲ್ಲಿ ಒಂದಾದ ಡಾಲ್ಫಿನ್‌ಗಳು ಒಮಾನ್‌ನ ಕರಾವಳಿ ಪ್ರದೇಶದಲ್ಲಿ ಯಥೇಚ್ಚವಾಗಿ ಕಂಡುಬರುತ್ತವೆ. ಈ ಡಾಲ್ಫಿನ್‌ಗಳನ್ನು ನೋಡಲು, ಇಲ್ಲಿನ ಕೆಲ ಕಂಪನಿಗಳು ಪ್ರವಾಸಗಳನ್ನು ಆಯೋಜಿಸುತ್ತಾರೆ. ಮುಸಂದಮ್, ಮಸ್ಕತ್ ಮತ್ತು ದಮಾನಿಯತ್ ಪ್ರದೇಶಗಳು ಡಾಲ್ಫಿನ್ ವೀಕ್ಷಣೆಗೆ ಜನಪ್ರಿಯವಾಗಿವೆ. ಈ ಪ್ರವಾಸದ ಸಮಯದಲ್ಲಿ ಡಾಲ್ಫಿನ್‌ಗಳನ್ನು ನೋಡುವುದರ ಜೊತೆಗೆ ಒಮಾನಿನ ಕರಾವಳಿಯ ರಮಣೀಯ ಸೌಂದರ್ಯವನ್ನು ವೀಕ್ಷಿಸಬಹುದು.ಡಾಲ್ಫಿನ್ ವೀಕ್ಷಣೆ ಜತೆಗೆ ಸ್ನಾರ್ಕ್ಲಿಂಗ್, ಸರ್ಫಿಂಗ್ ಹೀಗೆ ಹಲವಾರು ವಿವಿಧ ರೀತಿಯ ಆಟಗಳನ್ನು ಇಲ್ಲಿನ ಆಯೋಜಕರು ಆಯೋಜಿಸುತ್ತಾರೆ.

 

ದುಬೈ, ಮಲೇಶಿಯ, ಅಂತಹ ಅಂತರಾಷ್ಟ್ರೀಯ ನಗರಗಳಲ್ಲಿ ಡಾಲ್ಫಿನ್ ಗಳ ವೀಕ್ಷಣೆ ಒಂದು ಚಟುವಟಿಕೆಯಾಗಿದೆ,  Dolphinarium ಒಂದು ಸ್ಟೇಡಿಯಂ ಮಾದರಿಯಲ್ಲಿ ದೊಡ್ಡಾದ ಈಜುಕೊಳದಲ್ಲಿ ಸಾಕಿ ಪಳಗಿಸಿರುವ ಡಾಲ್ಫಿನ್ ಗಳ ಜತೆ ವಿವಿಧ ರೀತಿಯ ಆಟಗಳನ್ನು ಪ್ರದರ್ಶಕರು ಪ್ರಸ್ತುತ ಪಡಿಸುತ್ತಾರೆ. ವೀಕ್ಷರನ್ನು ರಂಜಿಸಲು ಈ ಡಾಲ್ಫಿನ್ ಗಳಿಗೆ ಸೂಕ್ತ ತರಬೇತಿಗಳನ್ನು ನೀಡಿರುತ್ತಾರೆ. ಸರ್ಕಸ್ ನಲ್ಲಿ ಕುಳಿತುಕೊಂಡು ನೋಡಿದ ಹಾಗೆ ಈ ಪ್ರದರ್ಶನ ವಿರುತ್ತದೆ. ಆದರೆ ಒಮಾನಿನ ಡಾಲ್ಫಿನ್ ವೀಕ್ಷಣೆ ನೈಸರ್ಗಿಕವಾದದ್ದು, ಇಲ್ಲಿ ಈ ಜೀವಿಗಳಿಗೆ ಯಾವುದೇ ರೀತಿಯ ಹಿಂಸೆಯನ್ನು ನೀಡಲಾಗುವುದಿಲ್ಲ. ಅವುಗಳಿರುವೆಡೆಗೆ ಪ್ರವಾಸಿಗರು ಪ್ರಯಾಣಿಸುವ ದೋಣಿ ಸಾಗುತ್ತದೆ. ಅವುಗಳ ಆಟವನ್ನು ನೋಡಿದ ನಂತರ ದೋಣಿಯು ತನ್ನ ಮೂಲಸ್ಥಾನಕ್ಕೆ ಹಿಂತಿರುಗುತ್ತದೆ.

 

ಡಾಲ್ಫಿನ್‌ ವೀಕ್ಷಣೆ ಇಷ್ಟೊಂದು ಪ್ರಖ್ಯಾತಿ ಪಡೆಯಲು ಕಾರಣವೇನೆಂದರೆ, ಒಮಾನಿನ ಸಮುದ್ರದಲ್ಲಿ ಹೇರಳವಾಗಿ ಕಾಣ ಸಿಗುವ ವಿವಿಧ ಪ್ರಾಕಾರದ  ಡಾಲ್ಫಿನ್‌ ಗಳು ಮುಂಜಾನೆ ಹೊತ್ತಿನಲ್ಲಿ ಸಮುದ್ರದ ಮೇಲ್ಭಾಗಕ್ಕೆ ಬಂದು ಎತ್ತರಕ್ಕೆ ನೆಗೆಯುವುದು, ಗುಂಪು ಗುಂಪಾಗಿ ಈಜುವುದು, ಲಾಂಗ್ ಜಂಪ್ ಮಾಡುವುದು ಇತ್ಯಾದಿ, ಹೀಗೆ ತನ್ನ ವಿವಿಧ ಆಟಗಳನ್ನು ನೈಸರ್ಗಿಕವಾಗಿ ಪ್ರದರ್ಶಿಸುವ ಪರಿ ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ಪ್ರವಾಸಿಗರು ಸಾಗುವ ದೋಣಿಯ ಪಕ್ಕದಲ್ಲಿಯೇ ಈ ಎಲ್ಲ ಆಟಗಳನ್ನು ನೋಡಬಹುದು. ಅವುಗಳ ಚಮತ್ಕಾರಿಕ ಪ್ರದರ್ಶನಗಳನ್ನು ನೋಡುವುದೇ ಒಂದು ಥ್ರಿಲ್. ಮಕ್ಕಳಿಗೆ ಈ ಡಾಲ್ಫಿನ್ ಗಳ ಆಟ ಬಹಳ ಇಷ್ಟವಾಗುತ್ತವೆ.

 

ಪ್ರವಾಸಿಗಳನ್ನು ಕೊಂಡೋಯ್ಯುವ ದೋಣಿಗಳ ಚಾಲಕರು ಹೇಳುವ ಪ್ರಕಾರ, ಪ್ರವಾಸಿಗರಿಗೆ ಡಾಲ್ಫಿನ್ ನೋಡುವ ಅದೃಷ್ಟ ವಿದ್ದರೆ  ಒಮ್ಮೊಮ್ಮೆ ನೂರಾರು ಡಾಲ್ಫಿನ್ ಗಳನ್ನು ನೋಡಬಹುದು. ಒಂದೊಂದು ಸಾರಿ ಅವುಗಳನ್ನು ಹುಡುಕಲು ನಾವು ಒಂದು ಗಂಟೆಯವರೆಗೆ ಸಮುದ್ರದೊಳಗೆ ಪ್ರಯಾಣಿಸಬೇಕಾಗಬಹುದು. ಕೆಲವೊಮ್ಮೆ ಒಂದು ಡಾಲ್ಫಿನ್ ಸಹ ನೋಡಲು ಸಿಗುವುದಿಲ್ಲ.  ಇದರ ಅರ್ಥ ಡಾಲ್ಫಿನ್ ಗಳು ಇರುವುದಿಲ್ಲ ಅಂತಲ್ಲ, ಆದರೆ ಸಮುದ್ರದ ಮೇಲೆ ಡಾಲ್ಫಿನ್ ಗಳು ಬರುವುದು ಕಡಿಮೆ. ಹೀಗೆ ಗುಂಪು ಗುಂಪಾಗಿ ಸಿಗುವ ಡಾಲ್ಫಿನ್ ಗಳು ಒಂದು ಇದ್ದಕಡೆ ಇನ್ನೊಂದು ದಿನ ಇರುವುದಿಲ್ಲ. ಪ್ರವಾಸ ಆಯೋಜಕರಿಗೆ ಇದು ಸ್ವಲ್ಪ ತಲೆನೋವಿನ ವಿಷಯವಾದರೂ, ದೋಣಿಗಳ ಚಾಲಕರು ತಾವು ಕಂಡ ಡಾಲ್ಫಿನ್ ಗಳು ಇರುವ ಸ್ಥಳವನ್ನು ಬೇರೆ ದೋಣಿಯವರಿಗೆ ತಿಳಿಸುತ್ತಾರೆ, ಪ್ರವಾಸಿಗರನ್ನು ಹೊತ್ತ ದೋಣಿಗಳು ಅವರು ತಿಳಿಸಿದ ಜಾಗಕ್ಕೆ. ಲಗ್ಗೆ ಇಡುತ್ತಾರೆ. ಪ್ರವಾಸ ಹೊರಡುವ ಸಮಯದಲ್ಲಿ, ಮುಂಜಾಗ್ರತೆಗಾಗಿ, ಅದೃಷ್ಟವಿದ್ದರೆ ಡಾಲ್ಫಿನ್ ಗಳನ್ನು ನೋಡಬಹುದು ಅಥವ ಇಲ್ಲ ಎನ್ನುವುದರ ಬಗ್ಗೆ ಮುಂಚೆಯೇ ಪ್ರವಾಸಿಗರಿಗೆ ತಿಳಿಸುತ್ತಾರೆ. ಈ ರೀತಿಯ ಒಂದು ಎಚ್ಚರಿಕೆ ಮಾತುಗಳು ಆಯೋಜಕರನ್ನು ಇಕ್ಕಟ್ಟಿಗೆ ಸಿಲುಕಿಸುವ ಸಂಭವ ಕಡಿಮೆ. ಡಾಲ್ಫಿನ್ ವೀಕ್ಷಿಸಲು ಉತ್ತಮ ಸಮಯವೆಂದರೆ ಅಕ್ಟೋಬರ್ ಮತ್ತು ಮೇ ನಡುವೆ. ಮೋಡ ಕವಿದ ದಿನಗಳಲ್ಲಿ ಅವುಗಳನ್ನು ಗುರುತಿಸುವ ಅಥವಾ ನೀರಿನಿಂದ ಜಿಗಿಯುವ ಸಾಧ್ಯತೆ ಕಡಿಮೆ, ಆದ್ದರಿಂದ ಪ್ರಕಾಶಮಾನವಾದ, ಬಿಸಿಲಿನ ದಿನಗಳಲ್ಲಿ ಡಾಲ್ಫಿನ್ ವೀಕ್ಷಿಸಲು ಶಿಫಾರಸು ಮಾಡಲಾಗುತ್ತದೆ.  ಬಿಬಿಸಿ ನ್ಯೂಸ್ ಸೇರಿದಂತೆ ಹಲವಾರು ಅಂತರಾಷ್ಟ್ರೀಯ ಚಾನೆಲ್ ಗಳು ಈ ಡಾಲ್ಫಿನ್ ಗಳ ಕುರಿತು ಡಾಕ್ಯುಮೆಂಟರಿಗಳನ್ನು ಮಾಡಿವೆ.

 

ಒಮಾನಿನ ಸಮುದ್ರ ತೀರದಲ್ಲಿ ಕಾಣ ಸಿಗುವ ಡಾಲ್ಫಿನ್‌ಗಳ ಪ್ರಕಾರಗಳು:

೧) ಹಿಂದೂ ಮಹಾಸಾಗರದ ಡಾಲ್ಫಿನ್‌ಗಳು,

೨) ಇಂಡೋ-ಪೆಸಿಫಿಕ್ ಹಂಪ್‌ಬ್ಯಾಕ್ ಡಾಲ್ಫಿನ್‌ಗಳು,

೩) ರಿಸ್ಸೋಸ್ ಡಾಲ್ಫಿನ್‌ಗಳು,

೪) ಬಾಟಲ್‌ ನೋಸ್ ಡಾಲ್ಫಿನ್‌ಗಳು,

೫) ಇಂಡೋ-ಪೆಸಿಫಿಕ್ ಬಾಟಲ್‌ನೋಸ್ ಡಾಲ್ಫಿನ್‌ಗಳು,

೬) ಒರಟಾದ-ಹಲ್ಲಿನ ಡಾಲ್ಫಿನ್‌ಗಳು,

೭) ಪ್ಯಾಂಟ್ರೊಪಿಕಲ್ ಸ್ಪಾಟೆಡ್ ಡಾಲ್ಫಿನ್‌ಗಳು,

೮) ಸ್ಟ್ರೈಪ್ದ್ ಡಾಲ್ಫಿನ್ ಗಳು

೯) ಸ್ಪಿನ್ನರ್ ಡಾಲ್ಫಿನ್ ಗಳು ಮತ್ತು

೧೦)ಉದ್ದ ಕೊಕ್ಕಿನ ಸಾಮಾನ್ಯ ಡಾಲ್ಫಿನ್ ಗಳು.

ಬರಹ:- ಪಿ.ಎಸ್.ರಂಗನಾಥ

ಮಸ್ಕತ್, ಒಮಾನ್ ರಾಷ್ಟ್ರ

#Oman #Kannada #Karnataka #kannadiga #Dubai #gulf #Dolphin #Muscat #bengaluru

ಅರೇಬಿಯಾದ "ಖಾಲಿ ಕ್ವಾರ್ಟರ್" ಪ್ರದೇಶ

 ಅರೇಬಿಯಾದ "ಖಾಲಿ ಕ್ವಾರ್ಟರ್" ಪ್ರದೇಶ

ಸಾಮಾನ್ಯವಾಗಿ ರಾಜ್ಯಗಳು, ರಾಷ್ಟ್ರಗಳ ಗಡಿ ಪ್ರದೇಶ ಗುರುತಿಸುವಾಗ, ಕೆಲ ಸ್ಥಳಗಳಲ್ಲಿ ಕಣಿವೆ ಪ್ರದೇಶ ನದಿ, ಅಥವ ಸಮುದ್ರದ ದಂಡೆಗಳನ್ನು ಗುರುತಾಗಿಟ್ಟುಕೊಳ್ಳುತ್ತಾರೆ. ಒಂದು ನದಿಯ ಈ ಕಡೆ ಒಂದು ರಾಷ್ಟ್ರ ಅಥವ ರಾಜ್ಯ ಅಂತಾದರೆ ಅದರಾಚೆಗೆ ಇನ್ನೊಂದು ರಾಷ್ಟ್ರ ಅಥವ ರಾಜ್ಯ ಅಂತ ಗುರುತಿಸುತ್ತಾರೆ. ಉದಾಹರಣೆಗೆ ಹೊಗೇನಕಲ್ ನ ಕಾವೇರಿ ನದಿ ತಮಿಳುನಾಡು ಕರ್ನಾಟಕವನ್ನು, ಬಳ್ಳಾರಿ ಜಿಲ್ಲೆಯಲ್ಲಿ ಹಗರಿ ನದಿ ಕರ್ನಾಟಕ ಮತ್ತು ಆಂಧ್ರಪ್ರದೇಶವನ್ನು ಹಾಗೆಯೇ ವಿಜಯಪುರ ಜಿಲ್ಲೆಯಲ್ಲಿ  ಭೀಮಾನದಿಯ ಒಂದು ಕಡೆ ಕರ್ನಾಟಕ ಮತ್ತೊಂದು ಕಡೆ ಮಹಾರಾಷ್ಟ್ರ ರಾಜ್ಯವಾಗಿ ವಿಭಜಿಸಲಾಗಿದೆ

ಮಧ್ಯಪ್ರಾಚ್ಯಾ ರಾಷ್ಟ್ರಗಳಲ್ಲಿ ಗಡಿ ಗುರುತಿಸುವಿಕೆ ಸಮಯದಲ್ಲಿ ಸಮಸ್ಯೆ ಬಂದಿತ್ತು. ಇಲ್ಲೊಂದು ದೊಡ್ಡದಾದ ಮರುಭೂಮಿ, ಯಾರಿಗೆ ಸೇರಬೇಕು ಎನ್ನುವ ಸಮಸ್ಯೆ ಹುಟ್ಟುಕೊಂಡಿತ್ತು. ಈ ಮರುಭೂಮಿಯಲ್ಲಿ ಆಗಲೇ ತೈಲ ನಿಕ್ಷೇಪಗಳು ಪತ್ತೆಯಾಗಿದ್ದವು, ಮುಂದೊಂದು ದಿನ ಅಪಾರ ಪ್ರಮಾಣವಾದ ಆರ್ಥಿಕ ವಹಿವಾಟು ನಡೆಯುವ ಮುನ್ಸೂಚನೆ ಗೊತ್ತಿದ್ದರಿಂದ ಬ್ರಿಟೀಷರು ಸ್ವಲ್ಪ ಜಾಗ್ರತೆ ವಹಿಸಿ, ಈ ಅರೇಬಿಯಾದ ಮರುಭೂಮಿಯನ್ನು ನಾಲ್ಕೂ ರಾಷ್ಟ್ರಗಳಿಗೆ ವಿಭಜಿಸಿಕೊಟ್ಟರು. ಈ ಮರುಭೂಮಿಯಲ್ಲಿ ಜನವಸತಿ ಬಹಳ ಕಡಿಮೆ. 

ಸಮುದ್ರದ ಮಧ್ಯಭಾಗದ ನೋಡಿದರೆ ಎತ್ತ ನೋಡಿದರೂ ನೀರು, ಕಣ್ಣು ಹಾಯಿಸಿದ ದೂರದಷ್ಟೂ ನೀರು ಇರುತ್ತದೆ. ಅದೇ ರೀತಿ ಮರುಭೂಮಿಯಲ್ಲೂ ಸಹ ಮಧ್ಯಭಾಗದಲ್ಲಿ ನಿಂತು ನೋಡಿದರೆ ಕಣ್ಣು ಹಾಯಿಸಿದ ದೂರದಷ್ಟೂ ಮರಳೇ ಇರುತ್ತದೆ. ಇದಕ್ಕೆ ಆಂಗ್ಲಭಾಷೆಯಲ್ಲಿ Sand Sea (ಸ್ಯಾಂಡ್ ಸೀ) ಎನ್ನುತ್ತಾರೆ, ಅಂದರೆ ಮರಳಿನ ಸಾಗರ ಅಥವ ಮರಳಿನ ಸಮುದ್ರ. ಇಂತಹ ದೊಡ್ಡದಾದ ಮರಳಿನ ಸಮುದ್ರ ಮಧ್ಯಪ್ರಾಚ್ಯಾದ ನಾಲ್ಕು ರಾಷ್ಟ್ರಗಳಲ್ಲಿ ಹರಡಿಕೊಂಡಿದೆ. ಅದೇ "Empty Quarter" ಅಥವ "ಖಾಲಿ ಕ್ವಾರ್ಟರ್" ಮತ್ತು ಅರೇಬಿಕ್ ಭಾಷೆಯಲ್ಲಿ "ಅಲ್ ರಬ್ ಅಲ್ ಖಾಲಿ" ಮರುಭೂಮಿ ಎಂದು ಕರೆಯುತ್ತಾರೆ. 

ಇದು ವಿಶ್ವದ ಅತ್ಯಂತ ದೊಡ್ಡ ಮರುಭೂಮಿಗಳಲ್ಲಿ ಒಂದು.  ಫ್ರಾನ್ಸ್, ಬೆಲ್ಜಿಯಂ ಮತ್ತು ನೆದರ್ಲ್ಯಾಂಡ್ಸ್  ದೇಶಗಳ ಭೌಗೋಳಿಕ ವಿಸ್ತೀರ್ಣದಷ್ಟು ದೊಡ್ಡದಿದೆ, ಅಂದರೆ ಸುಮಾರು 650,000 ಚದರ ಕಿಲೋಮೀಟರ್ (250,000 ಚದರ ಮೈಲಿ) ವಿಸ್ತೀರ್ಣದಷ್ಟು, ಮತ್ತು 1,000 ಕಿಲೋಮೀಟರ್ (620 ಮೈಲಿ) ಉದ್ದ ಮತ್ತು 500 ಕಿಲೋಮೀಟರ್ (310 ಮೈಲಿ) ಅಗಲವನ್ನು ಹೊಂದಿದೆ. ಈ ಮರುಭೂಮಿಯನ್ನು ಸೌದಿ ಅರೇಬಿಯಾ, ಯೆಮೆನ್, ಯುನೈಟೆಡ್ ಅರಬ್ ಎಮಿರೇಟ್ಸ್ ಮತ್ತು ಒಮಾನ್ ದೇಶಗಳು ಹಂಚಿಕೊಂಡಿವೆ. 

ಈ ಪ್ರದೇಶವನ್ನು ಅತಿ ಹೆಚ್ಚು ತಾಪಮಾನವಿರುವ ಒಣ (ಬಂಜರು) ಪ್ರದೇಶ ಎಂದು ವರ್ಗೀಕರಿಸಲಾಗಿದೆ. ಬೇಸಿಗೆಯಲ್ಲಿ ದೈನಂದಿನ ತಾಪಮಾನವು 47 °C (117 °F) ಮತ್ತು 51 °C (124 °F) ನಡುವೆ ಇರುತ್ತದೆ. ಪ್ರತಿ ವರ್ಷ 3 cm (1.2 in) ಗಿಂತ ಕಡಿಮೆ ಮಳೆಯಾಗುತ್ತದೆ. ಕೆಲ ಜೀವ ವೈವಿಧ್ಯ ಉಳಿಉ ಬೆಳೆಯಲು ಈ ಮಳೆಯ ಪ್ರಮಾಣ ಸಾಕು ಎಂದು ತಜ್ಞರು ಹೇಳುತ್ತಾರೆ. ಇಲ್ಲಿ ನೀರಿನ ಕೊರತೆ ಇರುವುದರಿಂದ ಬಹಳ ಕಡಿಮೆ ಪ್ರಮಾಣದಲ್ಲಿ ಕೆಲ ಸಸ್ಯಗಳು ಮತ್ತು ಪ್ರಾಣಿಗಳು ಇಲ್ಲಿವೆ. ಆಫ್ರಿಕಾದ ಜಿಂಕೆಗಳು, ಓರಿಕ್ಸ್ (ನೇರವಾದ ಕೊಂಬುಗಳನ್ನು ಹೊಂದಿರುವ ಹುಲ್ಲೆಗಳು), ಮರಳು ಬೆಕ್ಕುಗಳು, ಸ್ಪೈನಿ-ಟೈಲ್ಡ್ ಹಲ್ಲಿಗಳು ಮತ್ತು ಇತರೆ ಪ್ರಾಣಿಗಳು ಅಲ್ಲಲ್ಲಿ ವಾಸಿಸುತ್ತವೆ.

ಇಂತಹ ಅತಿ ಉಷ್ಣ ಪರಿಸರದಲ್ಲೂ ಸಹ ಶತಶತಮಾನಗಳಿಂದ ಕೆಲ ಬುಡಕಟ್ಟು ಜನರು ವಾಸಿಸುತ್ತಿರುವುದು ವಿಶೇಷ. ಬಹುತೇಕ ಜನರು ಮರುಭೂಮಿಯ ಅಂಚಿನಲ್ಲಿ ತಮ್ಮ ವಾಸ್ತವ್ಯವನ್ನು ಕಟ್ಟಿಕೊಂಡಿದ್ದಾರೆ. ಮರುಭೂಮಿಯಲ್ಲಿ ವಾಸಿಸುವ ಇಂತಹ ಜನರಿಗಾಗಿ ಹಾಗೂ ಅಲ್ಲಲ್ಲಿ ತೈಲ ಉತ್ಪಾದನಾ ಕೇಂದ್ರಗಳಿಗೆ ಸಂಪರ್ಕ ಕಲ್ಪಿಸಲು ಕೆಲ ರಸ್ತೆಗಳನ್ನು ನಿರ್ಮಾಣ ಮಾಡಿದ್ದಾರೆ.

ಈ ಪ್ರದೇಶದಲ್ಲಿ ಕೆಲ ಹಳ್ಳಿಗಳಿದ್ದರೂ, ಅತಿಯಾದ ಬಿಸಿಲು ಮತ್ತು ನೀರಿನ ಅಗಾಧ ಕೊರತೆಯ ಕಾರಣದಿಂದ ಖಾಲಿ ಕ್ವಾರ್ಟರ್‌ನಲ್ಲಿ ಹೆಚ್ಚಿನ ಜನರು ವಾಸಿಸುವುದಿಲ್ಲ.  ಆಗಾಗ್ಗೆ ಬೀಸುವ ಬಿರುಗಾಳಿಗೆ ಮರಳಿನ ದಿಬ್ಬಗಳ ಸ್ವರೂಪವೇ ಬದಲಾಗುತ್ತದೆ. ಒಮ್ಮೊಮ್ಮೆ ರಸ್ತೆಯ ತುಂಬೆಲ್ಲಾ ಮರಳು ಮುಚ್ಚಿಕೊಂಡು ರಸ್ತೆಗಳೇ ಕಾಣದಾಗುತ್ತವೆ. ಮರಳಿನ ಬಿರುಗಾಳಿಯಿಂದ ಅಲ್ಲಲ್ಲಿ ಹೊಸದಾದ ಮರಳಿನ ದಿಬ್ಬಗಳು ಸೃಷ್ಟಿಯಾಗಿ ಜನರು ಮತ್ತು ವಾಹನಗಳ ಸಂಚಾರಕ್ಕೆ ಅಡ್ಡಿಯಾಗುತ್ತವೆ. ಈ ಪ್ರದೇಶದಲ್ಲಿನ ಹೆಚ್ಚಿನ ಭೂಮಿ ವಾಸ್ತವವಾಗಿ ಸಮುದ್ರ ಮಟ್ಟಕ್ಕಿಂತ ಎತ್ತರದಲ್ಲಿದೆ, ಯೆಮೆನ್ ಗಡಿಯ ಬಳಿ,  ಕೆಲ ದಿಬ್ಬಗಳು ಸಮುದ್ರ ಮಟ್ಟದಿಂದ 1,200 ಮೀಟರ್ (3,900 ಅಡಿ) ಎತ್ತರದಲ್ಲಿವೆ. ಮರುಭೂಮಿಯ ಮೇಲ್ಮೈ ಪ್ರದೇಶ ಕೆಂಪು-ಕಿತ್ತಳೆ ಬಣ್ಣದ ಮರಳಿನ ದಿಬ್ಬಗಳಿಂದ ಆವೃತವಾಗಿದೆ, ಮರಳಿನ ರಾಶಿ ಕೆಂಪು ಬಣ್ಣದಂತೆ ಕಾಣಲು ಮರಳಿನ ಕಣಗಳು ಕಬ್ಬಿಣದ ಆಕ್ಸೈಡ್‌ ಅಂಶ ಕಾರಣವಾಗಿದೆ.

ಹಾಲಿವುಡ್ ಚಲನಚಿತ್ರಗಳಾದ ಸ್ಟಾರ್ ವಾರ್ಸ್: ದಿ ಫೋರ್ಸ್ ಅವೇಕನ್ಸ್, ದಿ ಮ್ಯಾಟ್ರಿಕ್ಸ್, ದಿ ಪ್ಯಾಂಥರ್ ಮತ್ತು ಇತರ ಹಲವು ಅಂತರರಾಷ್ಟ್ರೀಯ ಚಲನಚಿತ್ರಗಳನ್ನು ಈ ಮರುಭೂಮಿಯಲ್ಲಿ ಚಿತ್ರಿಸಲಾಗಿದೆ.

 

ಖಾಲಿ ಕ್ವಾರ್ಟರ್ ಅನೇಕ ರಹಸ್ಯಗಳನ್ನು ಹೊಂದಿರುವ ನಿಗೂಢ ಸ್ಥಳವಾಗಿದೆ. ಮರಳಿನ ದಿಬ್ಬಗಳ ಕೆಳಗೆ ಅಗಾಧವಾದ ತೈಲ ನಿಕ್ಷೇಪಗಳಿವೆ. ಇದು ಲಕ್ಷಾಂತರ ವರ್ಷಗಳ ಹಿಂದೆ ಈ ಪ್ರದೇಶವು ಉಷ್ಣವಲಯದ ಮಳೆಕಾಡುಗಳಾಗಿದ್ದಾಗ ರೂಪು ಗೊಂಡಿರಬಹುದೆಂದು ಅಂದಾಜಿಸಲಾಗಿದೆ. ಮುಸ್ಲಿಂ ರ ಪವಿತ್ರ ಗ್ರಂಥ ಕುರಾನ್‌ನಲ್ಲಿ ಉಲ್ಲೇಖಿಸಲಾದ  Iram of the Pillars ಅಥವ "City of the pillars" "ಕಂಬಗಳ ನಗರ" ವನ್ನು ಕಳೆದುಹೋದ ನಗರ, ಪ್ರದೇಶ ಅಥವಾ ಬುಡಕಟ್ಟುಜನ ವಾಸಿಸಿದ್ದ ಪ್ರದೇಶ ಈ ಮರುಭೂಮಿಯಲ್ಲಿತ್ತು ಎಂದು ನಂಬಲಾಗಿದೆ. ರಾಡಾರ್ ಮತ್ತು ಉಪಗ್ರಹ ಚಿತ್ರಗಳ ವಿಶ್ಲೇಷಣೆಯ ಪ್ರಕಾರ ಆ ನಶಿಸಿಹೋದ ನಗರದ ಬಗ್ಗೆ ಸ್ವಲ್ಪ ಮಟ್ಟಿಗಿನ ಚಿತ್ರಣ ದೊರೆತಿದೆ. ಇಲ್ಲಿ ಕಂಡುಬಂದ ಹಿಪ್ಪೋಗಳು, ನೀರಿನ ಎಮ್ಮೆ ಮತ್ತು ಉದ್ದನೆಯ ಕೊಂಬಿನ ಜಾನುವಾರುಗಳ ಪಳೆಯುಳಿಕೆಗಳ ಸಾಕ್ಷಿಯಿಂದ ಸಾವಿರಾರು ವರ್ಷಗಳ ಹಿಂದೆ ಈ ಖಾಲಿ ಕ್ವಾರ್ಟರ್ ಕಡಿಮೆ ಶುಷ್ಕ ಪ್ರದೇಶವಾಗಿತ್ತು ಎಂದು ಸಂಶೋಧಕರು ಹೇಳಿದ್ದಾರೆ. ಕ್ರಮೇಣ ಹವಾಮಾನ ಬದಲಾದಂತೆ, ಈ ಪ್ರದೇಶವು ಅತಿ ಹೆಚ್ಚು ತಾಪಮಾನ ಪಡೆಯುತ್ತ ಹೋದಂತೆ ಇಲ್ಲಿನ ಜೀವ ರಾಶಿಗಳು ಕಣ್ಮರೆಯಾಗುತ್ತ ಬಂದಿವೆ. 

ಈ ಪ್ರದೇಶದಲ್ಲಿ ಇಷ್ಟು ದೊಡ್ಡದಾದ ಮರಳು ಹೇಗೆ ಸಂಗ್ರಹವಾಯಿತು ಎಂಬುದಕ್ಕೆ ಭೂವಿಜ್ಞಾನಿಗಳು ಅನೇಕ ವಿವರಣೆಗಳನ್ನು ನೀಡಿದ್ದಾರೆ. ಸಾವಿರಾರು ವರ್ಷಗಳ ಅವಧಿಯಲ್ಲಿ ಈ ಎಂಪ್ಟಿ ಕ್ವಾರ್ಟರ್ ನ ವಿವಿಧ ಭಾಗದಲ್ಲಿ ಮರಳು ಸಂಗ್ರಹವಾಗಿರುವ ಸಾಧ್ಯತೆ ಇದೆ. ಅದಲ್ಲದೆ, ಲಕ್ಷಾಂತರ ವರ್ಷದಲ್ಲಿ ಸಮುದ್ರಮಟ್ಟದಲ್ಲಿ ಅಗಾದವಾದ ಬದಲಾವಣೆಯಾಗಿದೆ ಕೆಲವೊಮ್ಮೆ ಸಮುದ್ರ ಮಟ್ಟ ಹೆಚ್ಚಿದೆ ನಂತರ ಕಡಿಮೆಯಾಗಿದೆ ಮತ್ತು ಪರ್ಶಿಯನ್ ಕೊಲ್ಲಿಯಲ್ಲಿ ಆದ ನೀರಿನ ಮಟ್ಟದ ಏರಿಳಿತ, ಗಾಳಿಯಿಂದಾಗಿ ಕ್ರಮೇಣ ಮರಳಿನ ಕಣಗಳು ಈ ಭಾಗಕ್ಕೆ ಸ್ಥಳಾಂತರವಾಗಿರುವ ಸಾಧ್ಯತೆ ಇದೆ ಎನ್ನಲಾಗಿದೆ. ಈ ಮಟ್ಟಿಗಿನ ಬದಲಾವಣೆ ಕೆಲವೇ ವರ್ಷಗಳಲ್ಲಿ ಆಗಿರುವ ಸಾಧ್ಯತೆಯಿಲ್ಲ, ಬದಲಾಗಿ ಸಾವಿರಾರು ವರ್ಷಗಳಲ್ಲಿ ಹಂತ ಹಂತವಾಗಿ ನಡೆದಿರಬಹುದು. 

ತಲಕಾಡಿನಲ್ಲಿ ಅಷ್ಟೊಂದು ಮರಳಿನ ರಾಶಿ ಹೇಗೆ ಸಂಗ್ರಹ ಗೊಂಡಿತು? ಮತ್ತು ಆ ಮರಳಿನ ರಾಶಿಯಲ್ಲಿ ಹುದುಗಿರುವ ಪುರಾತನ ದೇವಾಲಯಗಳು, ಕಟ್ಟಡಗಳನ್ನು ನೋಡಿ ಹೀಗೂ ಸಾಧ್ಯವಾ ಎಂದು ಮೂಗಿನ ಬೆರೆಳಿಟ್ಟುಗೊಳ್ಳುವ ನಾವು, ಅಲ್ಲಿನ ಗೈಡ್ ಕೊಡುವ ವಿವರಣೆ ಕೇಳಿ ಆಶ್ಚರ್ಯ ಪಡುತ್ತೇವೆ. ಆ ಒಂದು ಅಂದಾಜಿನ ಮೇಲೆ ಈ ಖಾಲಿ ಕ್ವಾರ್ಟರ್ ಪ್ರದೇಶದಲ್ಲಿ ಮರಳು ಹೇಗೆ ಸಂಗ್ರಹವಾಗಿರುತ್ತದೆ ಎನ್ನುವುದನ್ನು ಸ್ವಲ್ಪ ಮಟ್ಟಿಗಾದರು ಅರ್ಥ ಮಾಡಿಕೊಳ್ಳಬಹುದು.

ಬರಹ:- ಪಿ.ಎಸ್.ರಂಗನಾಥ

ಮಸ್ಕತ್, ಒಮಾನ್ ರಾಷ್ಟ್ರ

ವ್ಲಾಡ್ ದ ಇಂಪೇಲರ್"

ಕೆಲ ರಾಜ ಮಹಾರಾಜರುಗಳು ಪ್ರಜೆಗಳ ಯೋಗಕ್ಷೇಮಕ್ಕಾಗಿ ಅವರು ನೀಡಿದ ಒಳ್ಳೆಯ ಆಡಳಿತದಿಂದ ಇತಿಹಾಸದಲ್ಲಿ ಒಳ್ಳೆಯ ಹೆಸರನ್ನು ಸಂಪಾದಿಸಿದ್ದರೆ, ಕೆಲವರು ಪ್ರಜೆಗಳು ಸೇರಿದಂತೆ ವೈರಿಗಳನ್ನು ಕ್ರೂರವಾಗಿ ನಡೆಸಿಕೊಂಡಿದ್ದಕ್ಕೆ ಸಹ ಇತಿಹಾಸದ ಪುಟಗಳಲ್ಲಿ ದಾಖಲಾಗಿದ್ದಾರೆ. ಕ್ರೂರತೆ ಎನ್ನುವುದು ಅಂದಿನ ಕಾಲದಲ್ಲಿ ಸಾಮಾನ್ಯವಾಗಿತ್ತು. ಶತ್ರುಗಳ ಸಂಹಾರ ಮಾಡುವುದಕ್ಕೆ ಮುಂಚೆ ಚಿತ್ರ ಹಿಂಸೆ ನೀಡಿ ಅವರನ್ನು ಕೊಲ್ಲುವುದರಿಂದ, ತಮ್ಮ ವಿರೋಧಿಗಳಿಗೆ ಸಂದೇಶವನ್ನು ಕೊಡುತಿದ್ದರು. ಮತ್ತೊಮ್ಮೆ ನಮ್ಮ ತಂಟೆಗೆ ಯಾರೂ ಬರಬಾರದು ಎನ್ನುವುದು ಅವರ ಉದ್ದೇಶವಾಗಿರುತಿತ್ತು.

 

ಮಧುರೈ ಯನ್ನು ಆಳುತಿದ್ದ ಸುಲ್ತಾನ್ ಜಿಯಾಸುದ್ದೀನ್, ಹೊಯ್ಸಳರ ಕೊನೆಯ ದೊರೆ 80 ವರ್ಷದ ಮೂರನೇ ವೀರ ಬಲ್ಲಾಳರನ್ನು ಬಂಧಿಸಿ ಮಧುರೈ ಮೀನಾಕ್ಷಿ ದೇವಸ್ಥಾನದ ಹೊರಗಿನ ಕಂಬಕ್ಕೆ ನೇತು ಹಾಕಿ ಜೀವಂತವಾಗಿರುವಾಗಲೇ ಮೈಮೇಲಿನ ಚರ್ಮಸುಲಿದಿದ್ದರಂತೆ, ಅದೇ ಸ್ಥಿತಿಯಲ್ಲಿ ಮರಣ ಹೊಂದಿದ ನಂತರ ಶವವನ್ನು ತಿಂಗಳುಗಳವರೆಗೂ ನೇತು ಹಾಕಿದ್ದರೆಂದು ಅರಬ್ ಪ್ರವಾಸಿ ಇಬಿನ್ ಬಟೂಟ ದಾಖಲಿಸಿದ್ದಾನೆ.  ಇನ್ನೊಂದು ಘೋರ ಘಟನೆ ಶಿವಾಜಿಯ ಪುತ್ರ ಸಂಭಾಜಿಯದ್ದು. ಔರಂಗ ಜೇಬ್, ಸಂಭಾಜಿಯನ್ನು ಸೆರೆ ಹಿಡಿದು ಚಿತ್ರಹಿಂಸೆ ನೀಡಿ ಸಾಯಿಸಿ ಅವನ ದೇಹವನ್ನು ತುಂಡು ತುಂಡಾಗಿ ಕತ್ತರಿಸಿ ನದಿಯಲ್ಲಿ ಬಿಸಾಕುತ್ತಾನೆ. ಇಂತಹ ಹಲವಾರು ಘಟನೆಗಳು ಭಾರತದಲ್ಲಿ ನಡೆದಿವೆ.

 

ಆದರೆ ರೊಮೇನಿಯಾದ ದೊರೆ ಪ್ರಿನ್ಸ್ ವ್ಲಾಡ್ -3 ನಷ್ಟು ಕ್ರೂರತನವನ್ನು, ಪ್ರಪಂಚದ ಯಾವ ದೊರೆಯೂ ಬಹುಶಃ ಮೆರೆದಿರಲಾರ. ಅಷ್ಟೊಂದು ಕ್ರೂರಿಯಾಗಿದ್ದ ಅವನು. ಸುಮಾರು 80000 ರಿಂದ 100000 ಜನರನ್ನು ಅವನು ಸಾಯಿಸಿದ ಎಂದು ಹೇಳಲಾಗುತ್ತಿದೆ. "Vlad the Impaler" ಎನ್ನುವ ಅನ್ವರ್ಥನಾಮ ಅವನಿಗೆ ನೀಡಲಾಗಿತ್ತು. ಹಾಗೆಯೇ ಡ್ರಾಕುಲಾ ಎನ್ನುವ ಹೆಸರು ಸಹ ಜನಜನಿತವಾಗಿತ್ತು. Impaler ಅಂದರೆ ಶೂಲಕ್ಕೇರಿಸುವವ ಎಂದು ಅರ್ಥ. ಅಂತಿಂಥ ಶೂಲ ಅಲ್ಲ ಅದು, ನಮ್ಮ ಕ್ರಿಕೆಟ್ ಆಟದಲ್ಲಿ ಬಳಸುವ ವಿಕೆಟ್ ಮಾದರಿಯದ್ದು. ವಿಕೆಟ್ ಗಿಂತ ದಪ್ಪ ಮತ್ತು ಎತ್ತರ ಆರು ಅಡಿಗಿಂತಲೂ ಜಾಸ್ತಿಯಿರುತಿತ್ತು. ಶತ್ರುಗಳನ್ನ ಕೈಕಾಲು ಕಟ್ಟಿ ಮೇಜಿನ ಮೇಲೆ ಬೋರಲಾಗಿ ಮಲಗಿಸಿ ಅವರ ಗುದದ್ವಾರದಲ್ಲಿ ಈ ಶೂಲವನ್ನು ಏರಿಸಿ ಎದೆಯ ಭಾಗದಿಂದ ಆಚೆ ಬರುವಂತೆ ಹಿಂಬದಿಯಿಂದ ಹೊಡೆಯುತಿದ್ದರು. ನಂತರ ಆ ದೇಹದ ಸಮೇತ ಶೂಲವನ್ನು ರಸ್ತೆಯ ಬದಿಗಳಲ್ಲಿ ನೆಡುತಿದ್ದರು. ರಸ್ತೆಯಲ್ಲಿ ಓಡಾಡುವವರು, ಆ ದೇಹಗಳನ್ನು ನೋಡಿ ದೊರೆ ವ್ಲಾಡ್ ನನ್ನು ಕೆಣಕುವ ಪ್ರಯತ್ನವನ್ನು ಯಾರು ಮಾಡಬಾರದು ಎನ್ನುವ ಸಂದೇಶವನ್ನು ರವಾನಿಸುತಿದ್ದ.

 

ವ್ಲಾಡ್ ಹುಟ್ಟಿದ್ದು ರೊಮೇನಿಯಾದ ದೇಶದ ಅಂದಿನ ವಲ್ಲಾಚಿಯಾದಲ್ಲಿ. ಈ ವಲ್ಲಾಚಿಯಾ ಪ್ರಾಂತ್ಯದ ಉತ್ತರಕ್ಕೆ ಕ್ರಿಶ್ಚಿಯನ್ನರು ಆಳುತಿದ್ದ ಯುರೋಪ್ ರಾಷ್ಟ್ರಗಳಿದ್ದವು. ಇದರ ದಕ್ಷಿಣಕ್ಕೆ ಮುಸ್ಲಿಂ ಒಟ್ಟೋಮನ್ ಗಳು ಆಳುತಿದ್ದ ತುರ್ಕಿರಾಷ್ಟ್ರವಿತ್ತು. ಈ ವಲ್ಲಾಚಿಯಾ ಪ್ರಾಂತ್ಯವು ಮಧ್ಯದಲ್ಲಿದ್ದರಿಂದ ಪದೇ ಪದೇ ಯುದ್ದಗಳಾಗುತಿದ್ದವು. ಒಟ್ಟೋಮನ್ ಸಾಮ್ರಾಜ್ಯವನ್ನು ಯುರೋಪ್ ನವರೆಗೂ ವಿಸ್ತರಿಸುವ ಆಕಾಂಕ್ಷೆಗೆ ವಲ್ಲಾಚಿಯಾದಲ್ಲಿನ ಆಡಳಿತಗಾರರು ಅಡ್ಡಿಯಾಗುತಿದ್ದರು. ವಲ್ಲಾಚಿಯಾದ ಆಡಳಿತಗಾರರಿಗೆ ಯುರೋಪ್ ನ ಹಲವಾರು ರಾಜ ಮನೆತನಗಳು ಬೆಂಬಲಕ್ಕೆ ನಿಲ್ಲುತಿದ್ದರು. 

ತುರ್ಕಿಯ ಒಟ್ಟೋಮನ್ ಸುಲ್ತಾನ್, ವಲ್ಲಾಚಿಯ ಸೇರಿದಂತೆ ಕಾನ್ ಸ್ಟಾಂಟಿನೋಪಲ್ ಮೇಲೆ ನಿಯಂತ್ರಣ ಹೊಂದಲು ಬಯಸಿದ್ದ. ಒಟ್ಟೋಮನ್ ಸೈನ್ಯ ಬಹಳ ದೊಡ್ಡದಾಗಿತ್ತು. ಅತ್ಯಾಧುನಿಕ ಶಸ್ತ್ರಾಸ್ತ್ರಗಳನ್ನು ಅವರು ಹೊಂದಿದ್ದರು. ಪ್ರಬಲರಾಗಿದ್ದ ಅವರು ದಿನೇ ದಿನೇ ಪ್ರವರ್ಧಮಾನಕ್ಕೆ ಬರುತಿದ್ದರು. ಇಂತಹ ಬಲಾಡ್ಯ ತುರ್ಕಿ ಸೈನ್ಯದ ಮುಂದೆ ವಲ್ಲಾಚಿಯಾ ಏನೂ ಅಲ್ಲ. ಕ್ರಿ.ಶ 1442 ರಲ್ಲಿ ಒಟ್ಟೋಮನ್ ಸಾಮ್ರಾಜ್ಯದ ಸುಲ್ತಾನ್ ಮುರಾದ್ II ರೊಂದಿಗಿನ ರಾಜತಾಂತ್ರಿಕ ಸಭೆಗೆ ವ್ಲಾಡ್ II ಅವರನ್ನು ಕರೆಯುತ್ತಾರೆ. ಮಾತುಕತೆಗೆ ಅವರು ತಮ್ಮ ಚಿಕ್ಕ ಮಕ್ಕಳಾದ ವ್ಲಾಡ್ III ಮತ್ತು ರಾಡು ಅವರನ್ನು ಕರೆದು ಕೊಂಡು ಹೋಗುತ್ತಾರೆ. ಆದರೆ ಹೆಸರಿಗೆ ಮಾತ್ರ ರಾಜತಾಂತ್ರಿಕ ಸಭೆ. ವಾಸ್ತವವಾಗಿ ಅದೊಂದು ವ್ಯೂಹ ವಾಗಿತ್ತು. ಮಾತುಕತೆ ಫಲಪ್ರದವಾಗುವುದಿಲ್ಲ. ಈ ಸಂಧರ್ಭದಲ್ಲಿ ಸಭೆಗೆ ಬಂದ ಮೂವರನ್ನು ಸುಲ್ತಾನ್ ಬಂಧಿಸುತ್ತಾನೆ.

ಬಿಡುಗಡೆ ಯಾಗಬೇಕೆಂದರೆ, ತಮ್ಮ ಅಡಿಯಾಳಾಗಿರಬೇಕೆಂದು ಷರತ್ತು ವಿಧಿಸಲಾಗುತ್ತದೆ. ಷರತ್ತಿಗೆ ಬದ್ದರಾಗಿರಬೇಕೆಂದರೆ, ತನ್ನ ಮಕ್ಕಳನ್ನು ಒತ್ತೆಯಾಳಾಗಿಡಬೇಕು. ಇತ್ತ ಬೇರೆ ವಿಧಿಯಿಲ್ಲದೆ ಹಿರಿಯ ವ್ಲಾಡ್ II ತನ್ನ ಮಕ್ಕಳನ್ನು ಒತ್ತೆಇಟ್ಟು ಷರತ್ತಿನಡಿಯಲ್ಲಿ ತಾನು ಬಿಡುಗಡೆಯಾಗಿ ವಲ್ಲಾಚಿಯಾಗೆ ಮರಳುತ್ತಾನೆ.

 

ಒಟ್ಟೋಮನ್ನರ ಒತ್ತೆಯಾಳಾಗಿ ಯುವರಾಜ ವ್ಲಾಡ್ III ಮತ್ತು ಅವನ ಕಿರಿಯ ಸಹೋದರ ರಾಡು ಇರುತ್ತಾರೆ. ಸುಲ್ತಾನರು ಅವರನ್ನು ಕೇವಲ ಬಂಧಿಸುವುದಷ್ಟೇ ಅಲ್ಲ ಅವರಿಗೆ ಸೂಕ್ತ ಶಿಕ್ಷಣವನ್ನು ಕೊಡುತ್ತಾರೆ. ಕಿರಿಯ ಸಹೋದರ ರಾಡುವಿಗೆ ವಿಜ್ಞಾನ, ತತ್ವಶಾಸ್ತ್ರ ಮತ್ತು ಕಲೆಯನ್ನು ಕಲಿಸುತ್ತಾರೆ  ವ್ಲಾಡ್ III ಗೆ ಕುದುರೆ ಸವಾರಿ, ಯುದ್ದದ ರಣತಂತ್ರಗಳು, ಸೈನ್ಯದಲ್ಲಿ ಹೋರಾಡುವ ವಿಧಾನಗಳನ್ನು ಕಲಿಸುತ್ತಾರೆ.

 

ಆದರೆ ವಲ್ಲಾಚಿಯಾದಲ್ಲಿನ ನಂತರದ ಪರಿಸ್ಥಿತಿ ಭಯಂಕರವಾಗುತ್ತದೆ. ಸ್ಥಳೀಯ ಸೇನಾಧಿಕಾರಿಗಳು  (ಬೋಯಾರ್‌ಗಳು) ದುರ್ಬಲನಾಗಿದ್ದ ವ್ಲಾಡ್ II ರನ್ನು ವಲ್ಲಾಚಿಯಾದ ಆಡಳಿತದದಿಂದ ಕಿತ್ತೊಗೆಯುವುದಷ್ಟೇ ಅಲ್ಲದೆ ಕ್ರಿ.ಶ. 1447 ರಲ್ಲಿ ವಲ್ಲಾಚಿಯಾದ ಬಾಲ್ಟೆನಿ ಬಳಿ ಅವರನ್ನು ಕೊಲ್ಲುತ್ತಾರೆ.  ವ್ಲಾಡ್‌ನ III ಹಿರಿಯ ಸಹೋದರ ಮಿರ್ಸಿಯಾ ರನ್ನು ಚಿತ್ರಹಿಂಸೆಗೊಳಗಾಗಿಸಿ, ಎರಡು ಕಣ್ಣುಗಳನ್ನು ಕಿತ್ತು ಕುರುಡರನ್ನಾಗಿ ಮಾಡಿ ಜೀವಂತ ಸಮಾಧಿ ಮಾಡುತ್ತಾರೆ. ಈ ವಿಷಯ ವ್ಲಾಡ್‌ನ III ಕಿವಿಗೆ ಬಿದ್ದೊಡನೆ, ಅವನು ವ್ಯಾಘ್ರನಾಗುತ್ತಾನೆ. ಬಹುಶಃ ಈ ಘಟನೆಗಳು ಅವನ ಮನಸ್ಥಿತಿಯನ್ನು ಬದಲಾಯಿಸಿರುವ ಸಾಧ್ಯವಿದೆ ಎಂದು ಇತಿಹಾಸಕಾರರು ಹೇಳುತ್ತಾರೆ.

 

ಅತಂತ್ರವಾದ ವಲ್ಲಾಚಿಯಾವನ್ನು ಮುನ್ನೆಡೆಸಲು ವ್ಲಾಡ್‌ನ III ಗೆ ಅವಕಾಶ ನೀಡಲು ಒಟ್ಟೋಮನ್ ಸುಲ್ತಾನ್ ಯೋಚಿಸುತ್ತಾನೆ. ತನ್ನ ಅಧಿಪತ್ಯದ ಅಡಿಯಲ್ಲಿ ವಲ್ಲಾಚಿಯಾವನ್ನು ಆಳಬೇಕು ಮತ್ತು ನಮ್ಮ ಮಾತುಗಳನ್ನು ಮೀರಬಾರದು, ಪ್ರತಿವರ್ಷ ಕಪ್ಪವನ್ನು ಕೊಡಬೇಕು ಎನ್ನುವ ಷರತ್ತಿನೊಂದಿಗೆ ಕ್ರಿ.ಶ.1448 ರಲ್ಲಿ ವ್ಲಾಡ್‌ನ III ಯನ್ನು ಬಂಧಮುಕ್ತಗೊಳಿಸಿ ವಲ್ಲಾಚಿಯಾದ ದೊರೆಯಾಗಿ ನೇಮಿಸುತ್ತಾರೆ. ಆದರೆ ವ್ಲಾಡ್ III ಒಟ್ಟೋಮನ್ ಗಳ ಮೇಲಿನ ದ್ವೇಷದಿಂದ  ಅವರ ವಿರುದ್ದ ಹೋರಾಡಲು ಒಟ್ಟೋಮನ್ ಗಳ ವೈರಿಗಳೊಂದಿಗೆ ಸ್ನೇಹ ಬೆಳೆಸುತ್ತಾನೆ. ಪದೇ ಪದೇ ಯುದ್ದಗಳಿಗೆ ಒಳಗಾಗುತಿದ್ದ ವಲ್ಲಾಚಿಯಾವನ್ನು ಸಂರಕ್ಷಿಸಿಕೊಳ್ಳಲು ತನ್ನ ಸೈನ್ಯವನ್ನು ಇನ್ನೂ ದೊಡ್ಡದಾಗಿಸಿಕೊಳ್ಳುತ್ತಾನೆ. ಯುರೋಪಿನ ಹಲವಾರು ರಾಜರು ಸಹಾಯ ಹಸ್ತ ಚಾಚುತ್ತಾರೆ.

 

ಈ ಮಧ್ಯೆ, ತನ್ನ ಕುಟುಂಬದವರ ಸಾವಿಗೆ ಕಾರಣರಾಗಿದ್ದ ಬೋಯಾರ್ ಗಳನ್ನು ಔತಣ ಕೂಟಕ್ಕೆ ಆಹ್ವಾನಿಸುತ್ತಾನೆ. ಎಲ್ಲರಿಗೂ ಔತಣ ನೀಡುವ ಸಮಯದಲ್ಲಿ ತನ್ನ ಯೋಧರಿಂದ ಎಲ್ಲಾ ಪುರುಷರನ್ನು ಬಂಧಿಸುತ್ತಾನೆ, ಕೆಲವರನ್ನು ಅಲ್ಲಿಯೇ ತುಂಡು ತುಂಡಾಗಿ ಕೊಚ್ಚಿ ಹಾಕುತ್ತಾನೆ, ಇನ್ನೂ ಕೆಲವರನ್ನು ಶೂಲಕ್ಕೇರಿಸುತ್ತಾನೆ. ವಲ್ಲಾಚಿಯಾದ ಹೊರಪ್ರದೇಶಗಳಲ್ಲಿ ನೂರಾರು ಜನರನ್ನು ರಸ್ತೆಯುದ್ದಕ್ಕೂ ನೇತು ಹಾಕುತ್ತಾನೆ. ಈ ದೃಶ್ಯಗಳು, ತುರ್ಕಿ ಸೇರಿದಂತೆ ಯುರೋಪಿನ ಹಲವು ಸಾಮ್ರಾಜ್ಯಗಳ ಮೈ ನಡುಗಿಸುತ್ತದೆ. ಡ್ರಾಕುಲಾ ವ್ಲಾಡ್ಎಂದಾಗ ಜನ ಭಯಭೀತಗೊಳ್ಳುತ್ತಿರುತ್ತಾರೆ. ಇಂತಹ ವಿಕೃತಿಯಿಂದ ತನ್ನ ಶತ್ರುಗಳ ಎದೆ ಝಲ್ಲೆನಿಸುತ್ತಿರುತ್ತಾನೆ. ಜನರು ಒಮ್ಮೆಗೆ ಪ್ರಾಣ ಬಿಡಬಾರದಂತೆ  ಶೂಲಕ್ಕೇರಿಸುತಿದ್ದನಂತೆ, ರಕ್ತವು ಮೈಯಿಂದ ಹೊರಬಂದು ನಿಧಾನವಾಗಿ ದೇಹದ ಅಂಗಾಂಗಗಳು ನಿಷ್ಕ್ರಿಯವಾಗಿ ಪ್ರಾಣ ಹೋಗುವಂತೆ ಮಾಡುತಿದ್ದನಂತೆ. ಹಲವಾರು ದಿನಗಳವರೆಗೆ ಜೀವಂತ ಸ್ಥಿತಿಯಲ್ಲಿದ್ದು ನಂತರ ಜನರು ಸಾಯುತಿದ್ದರಂತೆ. ಈ ರೀತಿ ಚಿತ್ರಹಿಂಸೆ ನೀಡುವುದನ್ನು ತುರ್ಕಿಯಲ್ಲಿದ್ದಾಗ ಕಲಿತಿರಬಹುದು ಎಂದು ಹೇಳಲಾಗುತ್ತಿದೆ. ಒಟ್ಟೋಮನ್ ಗಳು ಸಹ ತಮ್ಮ ವೈರಿಗಳನ್ನು ಶೂಲಕ್ಕೇರಿಸುತಿದ್ದರಂತೆ.

 

ಈ ಮಧ್ಯೆ 1453ರಲ್ಲಿ ಕಾನ್ ಸ್ಟಾಂಟಿನೋಪಲ್ ನಗರವನ್ನು ತುರ್ಕರು ತಮ್ಮ ವಶಮಾಡಿಕೊಳ್ಳುತ್ತಾರೆ. ಈ ಘಟನೆಯಿಂದ ವ್ಲಾಡ್‌ನ III ಚಿಂತಾಕ್ರಾಂತನಾಗುತ್ತಾನೆ. ತುರ್ಕಿಯ ಕಪಿಮುಷ್ಟಿಯಿಂದ ಬಿಡುಗಡೆಗೊಳಿಸಿಕ್ಕೊಳಲು ಹಲವಾರು ಮಾರ್ಗಗಳನ್ನು ಹುಡುಕುತ್ತಾನೆ. ಪ್ರತಿ ವರ್ಷ ಕಪ್ಪ ಕೊಡುತಿದ್ದ ವ್ಲಾಡ್, ಮೂರ್ನಾಲ್ಕು ವರ್ಷಗಳಿಂದ ಕಪ್ಪ ಕೊಟ್ಟಿರುವುದಿಲ್ಲ. ಮಾತುಕತೆಗೆ ಬನ್ನಿಯೆಂದು ತುರ್ಕಿಯ ಸುಲ್ತಾನ ಕರೆಕೊಟ್ಟಿರುತ್ತಾನೆ. ತನ್ನ ತಂದೆಗಾದ ಅನ್ಯಾಯವನ್ನು ಮನಸ್ಸಿನಲ್ಲಿಟ್ಟುಕೊಂಡು ಅಲ್ಲಿಗೆ ಹೋಗುವುದಿಲ್ಲ. ಸಂಧಾನಕ್ಕೆಂದು ಬಂದಿದ್ದ ಒಟ್ಟೋಮನ್ ಸಂಧಾನಕಾರರನ್ನು ಯಾವುದೇ ಮುಲಾಜಿಲ್ಲದೆ ಶೂಲಕ್ಕೇರಿಸುತ್ತಾನೆ. ಈ ಮೂಲಕ ತುರುಕರ ವಿರುದ್ದ ಹೋರಾಡಲು ನಾನು ಸಿದ್ದ ಎನ್ನುವ ಸಂದೇಶ ರವಾನಿಸುತ್ತಾನೆ. ತುರ್ಕಿಯ ವಿರುದ್ದ ಹಲವಾರು ಯುದ್ದಗಳನ್ನು ನಡೆಸುತ್ತಾನೆ. ಬಹುತೇಕ ಯುದ್ದಗಳಲ್ಲಿ ಯಶಸ್ವಿಯಾಗುತ್ತಾನೆ. ತನ್ನ ವಿಜಯದ ಬಗ್ಗೆ ಒಂದು ಪತ್ರದಲ್ಲಿ ಹೀಗೆ ದಾಖಲಿಸುತ್ತಾನೆ.  "ಡ್ಯಾನ್ಯೂಬ್ ನದಿ ಸಮುದ್ರಕ್ಕೆ ಸೇರುವ ಜಾಗದಲ್ಲಿನ ಒಬ್ಲುಸಿಟ್ಜಾ ಮತ್ತು ನೊವೊಸೆಲೊದಲ್ಲಿ ವಾಸಿಸುತ್ತಿದ್ದ ರೈತರು,  ಮಹಿಳೆಯರು ವೃದ್ದರು ಮತ್ತು ಮಕ್ಕಳು ಎಲ್ಲರನ್ನೂ ನಾನು ಕೊಂದಿದ್ದೇನೆ. ಯುದ್ದದಲ್ಲಿ ನಮ್ಮ ಸೈನ್ಯ  23884 ತುರ್ಕರನ್ನುಕೊಂದಿದೆ. ಮನೆಗಳಲ್ಲಿ ಜೀವಂತವಾಗಿ ಸುಟ್ಟುಹಾಕಿದ್ದೇವೆ, ಯುದ್ದದಲ್ಲಿ ರುಂಡ ಚೆಂಡಾಡಿದ್ದೇವೆ.  ಮಹಾಶಯರೇ, ನಾನು ಶಾಂತಿಯನ್ನು ಮುರಿದಿದ್ದೇನೆ ಎಂದು ನೀವು ತಿಳಿದಿರಬೇಕು." ಈ ಪತ್ರ ವ್ಲಾಡ್‌ III ನ ಪೈಶಾಚಿಕತೆಯನ್ನು ಎತ್ತಿ ತೋರಿಸುತ್ತದೆ. ಆಕ್ರಮಣಕಾರಿ ಒಟ್ಟೋಮನ್‌ಗಳ ಮೇಲಿನ ವ್ಲಾಡ್‌ನ ವಿಜಯಗಳನ್ನು ವಲ್ಲಾಚಿಯಾ, ಟ್ರಾನ್ಸಿಲ್ವೇನಿಯಾ ಮತ್ತು ಇತರ ಯುರೋಪ್‌ನಾದ್ಯಂತ ಆಚರಿಸಲಾಗುತ್ತದೆ. ಅಂದಿನ ಪೋಪ್ ಪಯಸ್ II ಸಹ ಈ ವಿಜಯದ ಕುರಿತು ಸಂತೋಷಿಸಿದ್ದರು.

 

ವ್ಲಾಡ್ ನ ಆಡಳಿತದ ಸಮಯದಲ್ಲಿ ತನ್ನ ವಿರೋಧಿಗಳು ಸೇರಿದಂತೆ  ಸುಮಾರು 80,000 ಜನರನ್ನು ಕೊಂದಿದ್ದಾನೆ ಎಂದು ಅಂದಾಜಿಸಲಾಗಿದೆ. ಇದರಲ್ಲಿ ಸುಮಾರು 20,000 ಜನರನ್ನು ಶೂಲಕ್ಕೇರಿಸಲಾಯಿತು ಮತ್ತು ಟಾರ್ಗೋವಿಸ್ಟ್ ನಗರದ ಹೊರಗೆ ಪ್ರದರ್ಶನಕ್ಕೆ ಇಡಲಾಗಿತ್ತು ಎಂದು ಇತಿಹಾಸಕಾರರು ದಾಖಲಿಸಿದ್ದಾರೆ. ಒಮ್ಮೆ ವಲ್ಲಾಚಿಯಾದ ಮೇಲೆ ಆಕ್ರಮಣ ಮಾಡುವುದಕ್ಕಾಗಿ ಒಟ್ಟೋಮನ್ ಸುಲ್ತಾನ್ ಮೆಹ್ಮದ್ II ದಂಡೆತ್ತಿ ಬಂದಾಗ, ಶೂಲಕ್ಕೇರಿಸಿದ್ದ ದೇಹಗಳನ್ನು  ಸ್ವತಹ  ಈ ಅಸಹ್ಯ ನೋಡಿ ಕಾನ್ಸ್ಟಾಂಟಿನೋಪಲ್ಗೆ ಹಿಂತಿರುಗಿದ ಎಂದು ಹೇಳಲಾಗಿದೆ. ಈ ದೃಶ್ಯವು ಎಷ್ಟು ಅಸಹ್ಯಕರವಾಗಿತ್ತು ಎಂದರೆ ಸಾವಿರಾರು ಕೊಳೆಯುತ್ತಿರುವ ದೇಹಗಳಿಂದ ಕಾಗೆಗಳು ಮಾಂಸವನ್ನು ಆಹಾರಕ್ಕಾಗಿ ಕಿತ್ತು ತಿನ್ನುವುದನ್ನು ನೋಡುತಿದ್ದರೆ,  ವಲ್ಲಾಚಿಯಾದ ಕಡೆ ತಲೆ ಹಾಕಲೇ ಬಾರದು ಎನ್ನುವ ಸಂದೇಶ ಹೋಗುತಿತ್ತು.

 

ಸರಿ ಸುಮಾರು ಎರಡು ದಶಕಗಳಕಾಲ ಒಟ್ಟೋಮನ್ನರು ಮತ್ತು  ವ್ಲಾಡ್ III ಮಧ್ಯೆ ಯುದ್ದ ನಡೆಯುತ್ತದೆ. ಒಂದು ಹಂತದಲ್ಲಿ ವಲ್ಲಾಚಿಯಾವನ್ನು ತಮ್ಮ ತೆಕ್ಕೆಗೆ ತೆಗೆದುಕೊಂಡ ಒಟ್ಟೋಮನ್ ಗಳು ವ್ಲಾಡ್ III ತಮ್ಮನಾದ ಯುವರಾಜ ರಾಡು ನನ್ನು ಸಿಂಹಾಸನದ ಮೇಲೆ ಕೂರಿಸುತ್ತಾರೆ. ಇತ್ತ ವ್ಲಾಡ್ III ಭೂಗತನಾಗುತ್ತಾನೆ. ಆಗಾಗ್ಗೆ ಹೊರಬಂದು ಒಟ್ಟೋಮನ್ನರ ಮೇಲೆ ಆಕ್ರಮಣ ನಡೆಸುತ್ತಿರುತ್ತಾನೆ. ಹಲವಾರು ಬಾರಿ ರಾತ್ರಿ ಹೊತ್ತಿನಲ್ಲಿ ಆಕ್ರಮಣ ಮಾಡಿ ನೂರಾರು ಸೈನಿಕರನ್ನು ಕೊಂದು ಹಾಕುತ್ತಾನೆ. ಯಾವ ಹೊತ್ತಿನಲ್ಲಿ ಎಲ್ಲಿ ಬರುತ್ತಾನೆ ಎನ್ನುವ ಸುಳಿವು ಕೂಡ ಇರುವುದಿಲ್ಲ. ಇತ್ತ ವಲ್ಲಾಚಿಯಾ ಕೈತಪ್ಪಿ ಹೋದಮೇಲೆ, ಯುರೋಪಿನ ಕೆಲ ಆಡಳಿತಗಾರರು ವ್ಲಾಡ್ ಗೆ ಬೆಂಬಲನೀಡುವುದಿಲ್ಲ.

 

ಒಮ್ಮೆ 1476 ರಲ್ಲಿ, ಒಟ್ಟೋಮನ್ನರೊಂದಿಗೆ ಯುದ್ಧ ನಡೆಯುತ್ತಿರುವಾಗ, ವ್ಲಾಡ್ III ನನ್ನು ಹೊಂಚು ಹಾಕಿ ತುರ್ಕಿಯ ಸೈನಿಕರು ಸೆರೆ ಹಿಡಿಯುತ್ತಾರೆ. ಆದರೆ, ಜೀವಂತವಾಗಿಟ್ಟರೆ ಮತ್ತೆ ತಮಗೆ ಆಪತ್ತು ತಪ್ಪಿದ್ದಲ್ಲ ಎಂದು ಅವನನ್ನು ಕೊಂದು ಹಾಕುತ್ತಾರೆ. ಅವನ ಶಿರಚ್ಛೇದ ಮಾಡಿ,  ತಲೆಯನ್ನು ಕಾನ್ಸ್ಟಾಂಟಿನೋಪಲ್ನಲ್ಲಿದ್ದ ಸುಲ್ತಾನ್ ಮೆಹ್ಮದ್ II ಗೆ ಕಳಿಸುತ್ತಾರೆ. ವ್ಲಾಡ್ ನ ತಲೆಯನ್ನು ಶೂಲಕ್ಕೇರಿಸಿ ನಗರದ ಮುಖ್ಯದ್ವಾರದಲ್ಲಿ ವಿಜಯದ ಸಂಕೇತವಾಗಿ ಇಡಲಾಗುತ್ತದೆ. ಇಲ್ಲಿಗೆ ಡ್ರಾಕುಲ ವ್ಲಾಡ್ ನ ರಕ್ತ ಸಿಕ್ತ ಅಧ್ಯಾಯ ಕೊನೆಯಾಗುತ್ತದೆ.

 ಬರಹ:- ಪಿ.ಎಸ್.ರಂಗನಾಥ.

ಮಸ್ಕತ್. ಒಮಾನ್ ರಾಷ್ಟ್ರ